Kryeministri Rama është duke zhvilluar një vizitë poune në bashkinë e Bajram Currit në Tropojë, vizitë të cilën ai ka deklaruar se do ta kryente edhe për të inspektuar nga afër Parkun Kombëtar të Valbonës, mbi lumin e të cilit po ndërtohen 3 hidrocentrale lokale.
Vetëm pak ditë më parë qeveria “Rama” mori vendimin për të pezulluar punimet për të paktën 6 HEC-e lokale mbi lumin e Shalës në Theth, ndërkohë që për valbonën deti tani është bërë vetëm një rishikim i disa lejeve dhe licencave për HEC-e lokale.
Por ndërkohë që vetëm dy ditë më parë aty u zhvillua një protestë e mijëra qytetarëve të ardhur nga e gjithë Shqipëria, për mos lejimin e ndërtimit të HEC-eve mbi lumin Valbona, puna në këto kantiere vijon pa u “shqetësuar” medje me intensitet të lartë.
Nga një foto-reportazh i fundit i agjencisë investigative “BIRN” me titull “3 HEC-e vazhdojnë punën në Parkun Kombëtar të Valbonës”, duket qartë intensiteti i punimeve në këtë park kombëtar dhe ndërhyrja e madhe në peisazhin natyror të parkut, si dhe betonizimi brutal i tij.
Nga fotot që gazetarët e “BIRN” kanë shkrepur në vend, shihet qartë përmasa e shkatërimit të parkut, mjetet e rënda që gërmojnë dhe shkatërrojnë pyllin, si dhe prishja dhe betonizimi i një pjese të shtratit të lumit “Valbona”, fundi i të cilit nuk dihet.
Më poshtë ja shkrimi i plotë i agjencisë “BIRN”:
3 HEC-e vazhdojnë punën në Parkun Kombëtar të Valbonës
Në Parkun Kombëtar të Valbonës, që prej 28 shtatorit, tre HEC-e kanë ngulur tabelat e lejes së ndërtimit – të miratuara me datë 8 shtator – dhe kanë filluar punimet.
Ekskavatorët dhe punëtorët vazhdojnë të punojnë për ndërtimin e hidrocentraleve me afat përfundimi 28 shtator 2018, ndërsa syve kureshtarë u tregojnë tabelat me firmat e kryetarit të Këshillit Kombëtar të Territorit Edi Rama, Zv. Kryetares Eglantina Gjermeni dhe Ministrit të Energjisë e Industrisë Damian Gjiknuri dhe u kërkojnë të largohen.
Qeveria shqiptare ka miratuar gjatë dekadës së fundit tre marrëveshje koncesionare për ndërtimin e 14 hidrocentraleve në lumin e Valbonës dhe në përrenjtë malorë që përbëjnë sistemin e tij ujëmbledhës.
Më 28 shtator banorët e luginës së Valbonës dhanë alarmin e fillimit të ndërtimit të hidrocentraleve dhe kërkuan ndalimin e menjëhershëm të punimeve dhe anulimin e lejeve të dhëna për 14 HEC-e. Lufta e tyre për të ndaluar atë që e quajnë një katastrofë për Valbonën vazhdon.
Këto janë fotot e shkrepura nga BIRN në luginën e Valbonës më datë 28 tetor 2016./Ivana Dervishi/BIRN/Valbonë/
