Kryeministri Rama ka qenë sot i pranishëm në takimin e nismës “Edhe Një” të anëtareve të Kryesisë së Partisë Socialiste për integrimin e grave në politikë dhe jetën publike. Në fjalën e tij ai theksoi se gratë janë më pak të korruptua se burrat dhe nënvizoi se qeveria ka rritur pjesëmarrjen e tyre në administratë duke ulur rrjedhimisht korrupsionin.
Por një fakt interesant që Rama deklaroi gjatë takimit ishte se PS është partia më e votuar nga gratë dhe vajzat. Kjo sipas tij bazohet në sondazhet e bëra nga vetë Partia Socialiste dhe do të thotë sipas tij se nëse do të votonin vetëm gratë në zgjedhje, Partia Socialiste do të merrte 85 mandate.
“Partia Socialiste është partia më e votuar nga gra dhe nga vajza. Këtë e tregojnë të gjitha anketimet që ne kemi bërë prej disa vitesh. E konfirmojnë proceset zgjedhore. Nëse në Shqipëri do të votonin vetëm gratë dhe vajzat, PS do merrte 85 deputetë vetëm. Po të votonin vetëm burrat, do të ishim rrotë më rrotë ose pak nën rrotë”, u shpreh Rama.
Rama vuri në dukje gjithashtu pjesëmarrjen e lartë të grave në qeveri dhe tha se një gjë e tillë do të reflektohet në pushtetin vendor.
“Një barrë e madhe e punës së qeverisë sot mbahet nga ministret që janë gra. Kur vijmë te pushteti vendor, ne kemi përcaktuar një rregull, në rast se kryetari i Bashkisë është mashkull, më e pakta nënkryetari i parë duhet të jetë grua. Sot nuk kemi zbatim të këtij rregulli. Sot para se të vija këtu, iu kam çuar një mesazh kryetarëve të bashkive që të respektojnë këtë rregull.
Gratë deputete bëjnë një punë voluminoze, në parlament dhe në terren. Territori shqiptar është i mbushur me plagë në kuptimin e refuzimit ndaj faktorit grua” tha Rama. /Opinion.al
