Të ashpra kanë qenë deklaratat e kryeministrit Edi Rama ndaj Këshillit të Europës lidhur me akuzat e ngritura ndaj ish-drejtuesve të UÇK-së.
Rama tha se Hashim Thaç dhe zyrtarë të tjerë të Kosovës janë arrestuar për akuza që nuk janë vërtetuar.
“E megjithatë ‘shtëpia e verdhë fantazmë’ e gjeti rrugën deri këtu jo vetëm për të mbërthyer imagjinatën por edhe në seancën e votimit në këtë sallë, që është shtëpia e kombeve evropiane. Dhe tashmë drejtues të një lufte janë në burg. Biden e ka quajtur një herë Thaçin si Xhorxh Uashingtonin e Kosovës por unë do ta quaja Josef K. Si karakteri i Kafkës dhe procesi, u arrestua nga një autoritet i largët, i panjohur, pa e kuptuar se për çfarë ishte akuzuar. Ai dha dorëheqjen me dinjitet dhe iu besua drejtësisë ndërkombëtare sepse në fund të fundit për drejtësinë e kishte vënë jetën në rrezik. Është ende atje, në burg, një Jozef K i gjallë, në burg nga një ‘Fake news’”, tha Kryeministri Rama.
