Asnjë kompromis për të lëshuar qeverinë. Kryeministri Edi Rama, ndërsa la të hapur sërish derën për një tryezë me opozitën tha se mandati që i ka dhënë populli kësaj qeverie nuk negociohet.
“Ideja se këtu do bëhet ndonjë kompromis, ku do futet si pjesë e kompromisit mandati që shqiptarët i kanë dhënë PS të qeverisë e vetme deri në vitin 2021 ta harrojnë. Këtu në Parlament ata nuk futen dot deri përpara vitit 2021”, theksoi Rama.
Sipas tij zgjedhjet lokale do të mbahen, pavarësisht nëse merr pjesë apo jo opozita, për të cilën tha se protestat po i zhvillon që të mos çelen negociatat për vendin, me shpresën se kështu e kanë mëtë lehtë të marrin mandatin.
“Ne do ecim përpara, nuk kemi ngrt për të bërë kalimin në Kuvend të reformës zgjedhore. Zonjat dhe zotërinjtë e opozitës nuk i kemi sjellë ne. I ka sjellë lista e hartuar dhe firmosur nga doktorja e shkencave horoskopike Monika Kryemadhi dhe nga artisti Lulzim Basha. Ne do lëmë një derë hapur për tryezë, por jo këtu. Atyre që kane vulat e partive dhe për ca kohë, do t’ju njohim të drejtën e vulës në tyrzë. Por nuk do presim gjatë, do presim aq sa është e arsyeshmen. Ata mendojnë se duke mos u çelur negociatat, ata pastaj do e kenë më të kollajshme për të marrë pushtetin, është thjesht dëshpërim. E mira e tyre është të hyjnë në zgjedhje, e keqja e tyre është të mos hyjnë në zgjedhjet. Natyrisht për Shqipërinë kjo nuk është e mirë, zgjedhjet vendore do bëhen në afatin e caktuar ne do marrim përsipër të qeverisim dhe aty ku ata kanë qeverisur deri më sot”.
Në kohën kur protestat e opozitës vazhdojnë prej disa javësh, shefi i qeverisë paralajmëroi dhe ndryshime të kodit penal. Kjo sipas Ramës bëhet për të mbrojtur deputetët por dhe çdo zyrtar të vendit.
“Duhet bërë paketa për të ndërhyrë në kodin penal, për t’i dhënë përgjigje disa shqetësimeve serioze. Që nga goditja për shkak të detyrës deri tek disa adresime, apo boshllëqe që prokurorët e gjykatës bëjnë hajgare me krimin. Bëjnë abuzime me hapësirën e sotme, që ka probleme. Ka një punë të tërë për rishkrimin e kodit penal, por kjo kërkon kohë. Paketa për t’i dhënë përgjigje adekuate dhe për ta pajisur shtetin me argument shumë të fort ligjor kur gjendet përballë barbarëve që futen në fushat e futbollit dhe ushtrojnë dhunë. Barbarëve që iu kthehen mjekëve. Nga janari deri më sot 4 mjek janë goditur. Në të 4 rastet nuk ka asgjë që të bën të mendosh se mjekët mund të kenë provokuar goditjen. Barbarëve që hedhësh gurë në emër të partisë ndaj policisë së shtetit, kjo është trimëri. Lironi djemtë tanë, bërtet partia e endacakëve, ndërsa paralajmëron shqiptarët se këtë herë do ndodhi ajo që nuk ndodhi. Asgjë nuk ndodh. Barbarëve dhe këtu në parlament, nuk mundet deputeti të ketë imunit për të goditur fizikisht deputetin. Pa llogaritur zyrtarët e lartë, funksionarë publikë, vetë deputetët në rrugë. Nuk mund të ketë gjobë për këto shfaqej dhune”, deklaroi Rama, ndërsa dhe vetë është sulmuar disa herë nga ish deputetë të opozitës në Kuvend, si me bojë apo me vezë. /Opinion.al
