Kryeministri Edi Rama ka qenë i ftuar në emisionin “L’Aria Che Tira” në televizionin “LA7” në Itali. Duke iu përgjigjur interesimit të moderatores për “situatën e vështirë” që po kalon Shqipëria me protestat, kryeministri përsëriti se bëhet fjalë për revoltën e politikanëve të vjetër, duke siguruar italianët se Shqipëria është një vend i qetë dhe i sigurt.
“Kam ardhur në Itali për të thënë se çfarë shihet në televizor, zhvillohet vetëm 1 kilometër përreth qendrës. Është revoltë e stabilishmentit të vjetër që është larguar pas vitesh në pushtet dhe sot revoltohet, sepse në përgjithësi shqiptarët s’dinë të humbasin. Dua të them se në Shqipëri vitin e kaluar kemi pritur gati gjysmë milioni turistë italianë dhe kush ka planifikuar të vijë, u them mos të tërhiqen. Vendi është i qetë, nuk ka asnjë problem. Gjithashtu në vitet e fundit janë dyfishuar sipërmarrjet italiane në Shqipëri”, është shprehur Rama./Opinion.al
