Kreu i qeverisë, Edi Rama ka përsëritur si arritje të PS dhe qeverisë pushtetin e ri që po i jepet gruas në vend, në kuadër të barazisë gjinore.
Gjatë fjalës së sotme në takimin e forumit te gruas, Rama ka deklaruar se nuk janë të largëta kohët kur gratë që politika i transformoi në thuajse burra, ndërkohë që sot prania e shumë grave po transformon politikën.
“Nuk është ekzagjerim dhe vetëpëlqim i tepruar nëse nënvizoj se është PS forca që po e sjell këtë transformim që ka ngritur këtë përpjekje për t’i dhënë kuptim krejt tjetër e për ta mbushur nocionin e barazisë gjinore, ka bërë të mundur që sot të kemi një pamje tjetër të nivelit të përfaqësimit të grave e vajzave në jetën publike të vendit”, tha Rama.
Rama u ndal te gratë ministre duke veçuar atë të Arsimit. “Gratë ministre kanë sjellë më shumë sesa ekuilibër të ri nga pikëpamja e statistikës së përfaqësimit por edhe cilësi të re, si ministrja e Arsimit model i shkëlqyer libershipi dhe kapaciteti për të përfshirë në dialog të gjithë aktorët e faktorët që përfaqësojnë interesa të caktuara në procesin e reformës në arsim. Më vjen keq për gjithë profesorët e doktorët që e kanë drejtuar burrërisht MAS, që një mësuese gjimnazi është ministri më i mirë i arsimit në 25 vjet që Shqipëria ka prodhuar” tha ai.
Sipas tij, profesorët e doktorët nuk e pranojnë, përpiqen të provojnë të kundërtën, “por sa më shumë bëjnë të kundërtën, unë bindem që jo vetëm ka qenë zgjedhja më e mirë, por jemi duke i bërë shërbimit më të madh ndaj fëmijëve që u hoqëm një burrë nga qafa në MAS”.
Duke u ndalur në akuzat e opozitës dhe jo vetëm, Rama ka thënë se sulmohen pasi janë ndryshe. “Ne sulmohemi se bëjmë gjëra ndryshe, për gjërat që bëjmë ndryshe, ndaj edhe ne nuk pranojmë as leksione, dhe as shprehje të cfarëdollojshme të kundërshtisë ndaj nesh që vjen në forma të papranueshme. Sulmohemi se jemi ndryshe, jo të përsosur, unë jam me më shumë të meta në këtë sallë, por jemi ndryshe dhe përfaqësojmë aspirata që i mbrojmë me pasion dhe luftojmë me pasion” tha ai./ Panorama
