Kryeministri Edi Rama nuk është optimist për atë që do të ndodhë javën e ardhshme në Këshillin Evropian, ku do të diskutohet për negociatat me Shqipërinë dhe Maqedoninë e Veriut. Në një intervistë për Irish Times Rama shtoi se Shqipëria është dëm kolateral.
Pjesë nga intervista:
Ndërsa Britania drejtohet për nga dera dalëse nga BE-ja, vendet në Evropën Lindore dhe Ballkan janë ende të etura për t’u bashkuar në union. Vendet anëtare do të njoftojnë javën e ardhshme nëse Shqipëria dhe Maqedonia e Veriut janë gati për të filluar bisedimet e pranimit.
Maqedonia e Veriut mund të marrë një dritë jeshile pas ndryshimit të emrit të saj për t’i dhënë fund një mosmarrëveshje disa vjeçare me Greqinë fqinje, por Shqipëria përballet me vonesë të mëtejshme për shkak të shqetësimeve për krimin e organizuar dhe korrupsionit dhe gjendjes së sistemit të saj gjyqësor.
“A jam optimist? Jo, ” tha Rama për The Irish Times.
Shqipëria dhe Maqedonia e Veriut kanë një mbështetje të fortë nga Brukseli, i cili dëshiron t’i shpërblejë ata për fillimin e reformave të shumëpritura.
“Nuk ka shumë për të qenë optimistë me atë që po ndodh sot në Evropë. Unë jam optimist për të ardhmen e vendit por jo për atë që do të ndodhë javën e ardhshme. ”
Ndërsa Hollanda, Danimarka dhe të tjera vende dëshirojnë që Shqipëria të bëjë më shumë për të luftuar grupet e korrupsionit dhe mafies, Rama e pikturon kombin e tij si viktimë e ndarjeve në BE dhe një debati të udhëhequr nga francezët se si duhet të reformohet para se të zgjerohet më tej.
“Ne jemi dëm kolateral,” argumenton Rama.
“Kur ka bomba diku dhe një kopësht goditet – ne jemi kopështi.”/Opinion.al
