Politikë

Rama në Thumanë, Bardhi: U kthye në vendin e krimit shtetëror


               Publikuar në : 16:19 - 13/12/19 |
Opi Nion

Gazment Bardhi, Sekretari i përgjithshëm i Partisë Demokratike, ka reaguar pas vizitës së kryeministrit Edi Rama në Thumanë.

Përmes një postimi në rrjetet sociale, Bardhi e ka cilësuar spektakël të shëmtuar të Ramës dhe kthim në vendin e krimit shtetëror.

Sekretari i përgjithshëm i Partisë Demokratike, thekson se Rama duhet t’iu thotë shqiptarëve çfarë përmbanin aktet e konstatimit për dy pallatet e shembura me 26 nëntor, çfarë masash u morën dhe kush i lejoi banorët të futeshin në pallate të pasigurta pas 21 shtatorit. Ai i kërkon Prokurorisë të veprojë menjëherë.

Reagimi i Bardhit

Spektakli i shëmtuar i Edi Ramës në Thumanë me shtëpitë që i ka detyrim ligjor për t’i ndërtuar është i papranueshëm dhe nuk e shpëton dot atë dhe bashkëpunëtorët e tij nga përgjegjësia morale, politike dhe penale.

Ai është kthyer në vendin e krimit shtetëror pa dhënë llogari për humbjen e jetëve të 24 njerëzve të pafajshëm. Në javën e tretë pas tërmetit, Edi Rama hesht për përgjegjësitë direkte të Komitetit të Emergjencave, të drejtuar prej tij dhe të Bashkisë së Krujës, përse banorët e pallateve të shembura në Thumanë u lejuan të jetojnë aty pas tërmetit të 21 Shtatorit.

Edi Rama është i detyruar t’u thotë shqiptarëve çfarë permbanin aktet e konstatimit për dy pallatet e shembura me 26 Nëntor, çfarë masash u morën dhe kush i lejoi banorët të futeshin në pallate të pasigurta pas 21 Shtatorit. Prokuroria duhet të veprojë menjëherë!
#DREJTËSI për viktimat e 26 Nëntorit!/ Opinion.al

Pas