“Do të flas 30 minuta për programin qeverisës”, lajmëroi sot para nisjes së seancës plenare, por kur u ngjit në foltore të pakta ishin fjalët për atë cka do të bëjë “Rama II” në 4 vitet e ardhme. Kryeministri apeloi për gjuhën e paqes në politikë dhe për bashkëpunim me opozitën për çështje kombëtare. Po kështu u ndal edhe tek votimi i Ruçit si kryetar parlamenti.
“Asnjëherë s’kam qenë më i sigurt se votimi i dy ditëve më parë i një individi do të sjellë përfitim publik. Jam i bindur se ju nuk do të toleroni në asnjë çast mazhorancën dhe do respektoni barazinë”, tha Rama nga foltorja e parlamentit.
Ndër të tjera, Rama është shprehur i vetëdijshëm për gabimet dhe defektet e mazhorancës gjatë programit të 4 viteve të shkuara, “sikurse jemi të vetëdijshëm për barrën e përgjegjësisë këtë mandat të dytë”, ka thënë ai.
“Uroj që kolegët opozitës të jenë bashkëpunues. 25 qershori tregoi se nuk fitohet duke i fryrë zjarrit të konfliktit. Në çdo gjë që bëjmë keq i bëjmë keq të ardhmes së fëmijëve tanë. Shumë më shumë thellësi në reformat që bëjnë shtet në të mirë të fëmijëve. Më shumë vëmendje, energji dhe burime financiare tek shkollat dhe mësimi”, ka thënë Rama.
Duke ftuar mazhorancën për bashkëpunim, Rama ka nënvizuar se dy palët kanë më shumë gjëra që i bashkojnë sesa i ndajnë.
“Ka më shumë gjëra që na bashkojnë sesa na ndajnë. Reputacioni i Shqipërisë në botë është diçka që duhet të na bashkojë. Në asnjë vend një grup politik nuk merr rrugët e botës për të dëmtuar reputacionin e vendit të tij. Të ndërmarrim një nismë të përbashkët, një tryezë të hapur për çështjet që duhet të na bashkojnë e që në peshën e tyre janë paketa e detyrimeve madhore”, ka pohuar Rama, i cili më tej ka prekur edhe çështjen e bashkimit të kombit shqiptar.
“Shqipëria e bashkuar me Evropën, apo bashkimi kombëtar i shqiptarëve janë apo nuk janë paketë e bashkëpunimit tonë? Nuk po flas për Shqipëri të madhe por për një popull të vetëm shqiptar, që ka dy shtete, por është ende larg së qeni i lidhur në të drejta dhe detyrime, kompakt në qëllimet e mëdha. Edhe gjuha jonë sot, shqipe, gjuha e unifikuar shqipe është e kërcënuar, ca nga inercia e boshllëkut të arsimit në tranzicion, ca nga çorodia e pjellë prej tranzicionit që na shfaqet në forma shqetësuese marrëzie, si ishte ajo që përfshiu edhe heroin tonë kombëtar Skënderbeun.
Njerëz që nuk maten as me zgjatimin e funbarkut të kalit të Gjergjit mbinë nga dheu për t’i bërë karshillëk historisë së tij, historisë sonë të fëmijëve tanë.
Aq qesharak, ai episod kërkon analizë, reflektim, jo për perden që nuk e mbuloi monumentin, por me cfarë u shfaq duke e përdorur atë perde të montuar si embrioni i një krimbi kërcënues, për harmoninë fetare dhe përkatësinë evropiane të shqiptarëve”
Rama ka folur edhe për marrëdhëniet me fqinjët e tjerë, të cilat sipas tij duhet të bazohen në një respekt të ndërsjellë.
“Çdo grek që jeton në Shqipëri është anëtar i familjes sonë dhe komuniteti grek është një urë lidhëse për dy vendet tona dhe për ata mbështetja e qeverisë shqiptare do të rritet. Por Shqipëria nuk do të mbyllë gojën për të drejtat e veta”, ka thënë Rama. /Opinion.al
