Aktualitet

Rama: Kompania nga Emiratet e Bashkuara ka interes për Përmetin


Bëhu pjesë e Grupit Zyrtar të Opinion.al
>> KËTU <<
               Publikuar në : 10:09 - 06/02/21 |
el ida

Kryeministri Rama u shpreh të shtunën, se kompania e Emirateve të Bashkuara Arabe, që do të investojë në ndërtimin e portit turistik të Durrësit, ka interesa për të investuar edhe në Përmet.

Sipas Ramës, grupi i ngarkuar nga princi i kurorës ka shfaqur interes për investime në struktura fermash dhe e kanë parë Përmetin si një nga zonat me potencialin më të madh të zhvillimit të turizmit në dekadën e ardhshme.

“Duhet të ketë patur një procedurë ose do të ketë në ditët në vijim për zhvillimin e masterplanit të fazës 1 në Durrës, që përfshin transformimin e portit të Durrësit në port turistik dhe spostimin e portit të mallrave në një port të ri në veri të Durrësit. Grupi i ngarkuar nga princi i kurorës për këtë investim, ka shprehur shumë interes për të investuar në Përmet. Ideja për të investuar në Përmet lidhet me disa faktorë, siç e kanë shprehur. Së pari ata kanë bërë një studim të rajoneve të vendit dhe sipas tyre Përmeti është një nga zonat me potencialin më të madh të zhvillimit të turizmit në dekadën e ardhshme.

Kur flasin për Përmetin, thonë që është shumë tërheqës për ne. Kanë bërë një viztitë në verë ku i kam shoqëruar unë. Përpara Covidit kanë bërë një vizitë vetë dhe u ka bërë përshtypje kjo pjesa që ka një qetësi të madhe në kuptimin e bashkëjetesës mes njerëzve.

Kur flasin ata për Përmetin besoj që edhe juve do të çuditeni nga pasioni për të cilin flasin.

Ata duan të investojnë në struktura fermash, pra turizëm fermash, ku njerëzit mund të vijnë, të jenë në një zonë rurale dhe të ndërtojnë aty shtëpi, vila, ndonjë hotel të vogël, por të gjitha të lidhura me fermën dhe traditën e kultivimit të gjithë paketës bujqësore të zonës dhe të gatimit. Duan të fusin edhe prodhimin artizanal ushqimor, është një projekt shumë i bukur”, u shpreh Rama duke shtuar se Përmeti do të ketë radhën pasi kompania të ketë kuptuar mirë vendin.

“Mendoj që në momentin, kur projekti i Durrësit do të hyjë në një fazë që ata ta kuptojnë mirë vendin, sigurisht Përmeti ka radhën”, tha Rama./Opinion.al

 

 

Pas