“Pengimi i zgjedhjeve dënohet 1-5 vite burg, falsifikimi i materialeve zgjedhore dënohet 1-5 vite burg, dënimi i materialeve zgjedhore dënohet 6 muaj deri 7 vite burg, korrupsioni 1-5 vite burg, kanosja apo dhunimi ndaj pjesëmarrësve në zgjedhje për të votuar dënohet me 6 muaj deri në 3 vite. Kanosja që i bëhet vëzhguesit 1-4 vite burg, 2-5 kur është në bashkëpunim, se këtu është bashkëpunimi i madh, këta duhet ta dëgjojnë. Pengimi i zgjedhjeve për të votuar personi dënohet 1-5 vite dhe 3-7 vite kur bëhet në bashkëpunim. Nëse ka budallenj që janë gati të përballen me këtë ligj të votuar nga parlamenti me iniciativë të PD-së dhe PS-së kur ishte në opozitë, për hatër të Lulit apo pse filxhani se ka nxjerrë akoma qartë, le të shkojë. Por unë besoj se njerëzit do të ftillohen dhe do të kuptojnë”.
Ishte ky paralajmërimi që kryeministri Edi Rama i bëri opozitës gjatë kësaj të enjteje në Kuvend, duke i treguar kështu burgun çdo individi qoftë ai dhe politikan që pengon zhvillimin e zgjedhjeve.
Por Lulzim Basha i ktheu përgjigje kundërshtarit të tij politik, nga Miloti ku ishte në mbështetje të protestuesve që bllokuan rrugën.
“Më 30 qershor nuk ka për të pasur zgjedhje në Shqipëri, këtë e di edhe bufi dhe vëllai i bufit Edi Rama. Zgjedhje pa opozitën nuk ka. Ato vetëm zgjedhje nuk janë. Opozita nuk mund të klonohet, ashtu siç mund të klonohen shërbëtorët e Edi Ramës. Ne jemi e vetmja opozitë, të bashkuar me njerëzit. Jemi sot këtu për të dëshmuar vendosmërinë tonë. Ne nuk do të lejojmë me asnjë mjet, me asnjë çmim, krim elektorat, zgjedhje false nuk do të ketë më. Le ta dijë mirë Rama dhe shërbëtorët e tij, në burg do të shkojnë me të vërtetë ata që cenojnë zgjedhjet: Vangjush Dako, e të tjerë që janë kapur duke trafikuar votat e shqiptarëve. Në asnjë qendër votimi nuk do të lejojmë krimin elektoral të përsëritet. Vetëm kështu do të mund të kthejmë normalitetin dhe stabilitetin duke u dhënë shqiptarëve të drejtën e pamohueshme për të zgjedhur ata parlamentin. Ky themel i demokracisë është e vetmja rrugë drejt Europës”, tha Basha./ Opinion.al
