Kryeministri Rama ka sulmuar ashpër sot sistemin e drejtësisë. Në fjalën e tij gjatë Konferencës së Lartë Antikorrupsion, kryeministri tha se koka e korrupsionit në Shqipëri nuk janë politikanët por korporata e gjykatëseve dhe prokurorëve që kanë garantuar pandëshkueshmërinë në sistem.
Ai paralajmëroi se nuk do të ketë dënime të zyrtarëve të lartë nga drejtësia e re nëse nuk dënohen më parë niveli i lartë i sistemit të drejtësisë që janë shkarkuar nga vetingu.
“Nuk do të ketë goditje në nivelit të lartë nëse nuk do të goditet niveli i lartë i korrupsionit në drejtësi. Nëse nuk do të shkojnë gjykatës e prokurorë pas hekurave harrojeni që do të dënohen zyrtarë të lartë. Përndryshe SPAK do të jetë zhgënjimi më i madh i shqiptarëve nga reforma në drejtësi, pas gjithë këtij angazhimi të madh. SPAK ka misionin të pastrojë deri në fund ata që vetingu i pastron nga sistemi ti pastrojnë nga jeta shoqërore dhe t’i dërgojë në burg. Koka e korrupsionit në Shqipëri nuk janë dhe nuk kanë qenë politikanët, ka qenë korporata e gjykatëseve dhe prokurorëve që kanë garantuar pandëshkueshmërinë në sistem. Po të mos ishin këta nuk do të kishte qenë as korrupsioni spektakolar dhe vrastar i politikanëve. Nëse nuk vendoset ne themel të sistemit të drejtësisë kurbani i korrupsionit 30 vjeçar që është fiks te korporata që vetingu po e shpërbën, atëherë godina nuk do të qëndrojë.”, tha Rama./Opinion.al
