Kryeministri Edi Rama nga dita e premte ndodhet në Prishtinë për të marrë pjesë në festimet e pavarësisë së Kosovës.
Ndërkohë, mes dy kryeministrave, ka pasur një ‘përplasje’ në lidhje me demarkacionin me Malin e ZI.
Edi Rama pas lajmit të marrëveshjes se demarkacionit (përcaktimit të kufirit mes Kosovës dhe Malit të Zi) deklaroi në një intervistë në Klan Kosova se mbajtja peng e saj ishte një shpikje e Ramush Haradinajt.
Nga ana tjetër, kryeministri Haradinaj, përmes një shënimi në rrjetin social Facebook, shkruan: Edi Rama nuk ka çfarë të flasë për shpikjet politike në Kosovë! Le të merret me shpikjet e veta brenda Shqipërisë se i dalin boll.
Nuk vonoi shumë dhe pikërisht ashtu siç vetëm politika shqiptare di të sillet, deklarata u pasua me një foto të postuar nga Edi Rama në Facebook, ku dy kryeministrat trokisnin gotat.
Me shumë gjasa, klasa politike shqiptare si përtej dhe këtej Drinit ka kapërcyer mjaft mirë divergjencat kulturore, ideore dhe bindjet e caktuara për çështje të caktuara, që në fund të ditës të mbetet dhe pak kohë për të trokitur gotat.
Dhe, në mos qoftë kjo, të paktën natën e djeshme është konsumuar një nga ato scoop-e që janë dëshmi flagrante e tezës se politikanët tanë nuk duhen marrë më seriozisht sesa duhen. Se ata uzurpojnë në sferën publike shumë më hapësirë se sa u takon.
Si për të dëshmuar rëndësinë e ktyre radheve të shkruara më sipër, Edi Rama ka folur për marrëdhëniet midis dy vendeve në Top Channel, si dhe për debatin me homologun kosovar.
I pyetur nëse e kapërceu ngërçin me kryeministrin Haradinaj, Rama u përgjigj: Jo e kishim lënë darkën pas emisionit dhe nuk kishte asgjë për të sqaruar. Unë kam bindjen time, ai të vetën, nuk ka asnjë problem. Unë ashtu sikundër jam i drejtpërdrejtë kur flas, nuk e kam problem kur të tjerët janë të drejtpërdrejtë kur flasin. Nuk ka rëndësi fare, në fund fare se çfarë është thënë, rëndësi ka se çfarë do të bëhet. Unë uroj shumë që Ramushi do të bëjë gjënë e duhur dhe me kaq mbaron.
