Gjatë prezantimit të buxhetit 2022 për sektorin e peshkimit, Rama nuk i kurseu batutat me peshkatarët në portin e Durrësit.
Teksa bëri me dije investimin që do të kryhet në portin e Vlorës gjatë vitit të ardhshëm, Rama u shpreh se porti i ri që pritet të ndërtohet do të jetë më i mirë se ai i Durrësit dhe ndaj i sugjeroi peshkatarët të zgjerohen në Vlorë tashmë.
“Kemi arritur që 41 milionë euro nga BE të jenë në dispozicionin tuaj, gjatë këtyre viteve që kemi përpara. Këtu duhet të jeni ju të gatshëm për të thithur fondet përmes projekteve. Kuptohet në bazë të standarteve të Bashkimit Evropian. Këtu jeni ju, nuk jemi ne që duhet t’i bëjmë për ju. Sugjerimi im është të krijoni një strukturë ekspertësh, që mos të jeni secili më vete, strukturë të ndihmojë dhe asistojë subjektet, për të përgatitur projektet, për të bërë fishat dhe për t’i adoptuar në gjuhën e Bashkimit Evropian, me qëllim që mos të humbasim asnjë euro. Që mos të jenë lekët atje dhe në të mos të kemi mundësi për t’i marrë nëse nuk çojmë projektet e duhura.
Ndërkohë e dyta fillojmë portin e peshkimit në Vlorë që do të jetë me standarte dhe kushte higjeno-sanitare si portet më të mira të Bashkimit Evropian. Këtu, ju e dini që ky port ka defektet e veta, por ishte fakt i kryer, këtu çfarë mund të bëjmë është vetëm çfarë mund të axhustojmë, pasi projekti ka qenë përsëmbrapshi. Më vjen shumë keq për ju durrsakët se jam dhe deputeti juaj, por ai porti i peshkimit në Vlorë do jetë më i mirë se ky. Molo kështu që zgjero flotën e peshkimit ço dhe ca në Vlorë, kap dhe Vlorën tani, por kujdes aty se aty je shumë demokrat për të qenë i mirëseardhur, kështu duhet të jesh çik më i qetë”, tha Rama.
