Kryeministri Rama i është përgjigjur liderit të opozitës, Lulzim Basha për akuzat se ai ka prishur marrëveshjen e 5 qershorit.
Rama tha se nëse PD nuk e do marrëveshjen le ta heqin pasi ajo nuk i pëlqen as mazhorancës.
“Nëse Basha nuk e do më marrëveshjen, ka një mënyrë shumë të thjeshtë që ti themi se s’ekziston. Ta heqim. Të depolitizojmë administratën zgjedhore, të bëjmë edhe 2-3 ndryshime që ne i donim dhe ata nuk i donin dhe unë mendoj që do t’i bënim mirë vendit, do t’i bënim mirë zgjedhjeve. Natyrisht që e them këtë për të kuptuar të gjithë, që në fakt e kundërta është e vërtetë. Marrëveshja është aty dhe është e vërtetë dhe ne do të bëjmë ç’mosin që të votohet nga opozita parlamenatare që për fat të keq ka huqin e shtëpisë ku është rritur se janë rritur në të njëjtën shtëpi politike, PD, dhe ata që vijnë nga kioskat përreth shtëpisë. Nuk jemi dy palë, jemi 3 palë. Po kjo PS ka ndonjë të drejtë kjo, apo është këtu për t’i dhënë pëlqimin absolut vetëm një pale. Ku është parë kjo? Ne jemi të vetëdijshëm që duhet të lëshojmë, jo se e kemi për detyrë.”
Më tej Rama tha se ai nuk do ta heqë marrëveshjen megjithëse ajo nuk i pëlqen por theksoi se ajo nuk është kusht për anëtarësim në BE.
“Nuk dua ta rrëzojmë edhe pse nuk më plëqen por ky është një proces që unë i pari flas për të tjetër. Ne duhet të japim shembullin tonë. Ne nuk na pëleqen marrëveshja ne donim depolitizimin e administratës. Më vjen keq që Basha thotë e bëmë me zor se nuk e bëmë me zor. Nuk ka kusht që të bëjmë marrëveshje me Lulzim Bashën nuk është e shkruar. As që Shqipëria të bëjë marrëveshje për konferencën e parë ndërqeveritare. Shqipëria është shtet sovran që me fuqinë e popullit troket në dyert e BE. Shqipëria është shtet dhe ka për detyrë t’i provojë BE që përmbush kriteret për të qenë anëtar i BE. Reforma zgjedhore është kusht kyç, gjykimi bëhet mbi produktin jo mbi faktin kush u mërzit nga reforma. Kjo nuk është pjesë e standarteve që u mërzit Luli.”/ Opinion.al
