Sulmet me raketa ruse kanë goditur portin jugor të Ukrainës, Odesa, vetëm një ditë pasi Ukraina dhe Rusia ranë dakord për një marrëveshje që do të lejonte rifillimin e eksporteve jetike të grurit nga rajoni.
Presidenti ukrainas Volodymyr Zelensky ka akuzuar Rusinë për “barbarizëm” pas sulmit me raketa në portin e Odesës, duke vënë në pikëpyetje marrëveshjen historike për të rifilluar eksportet e drithërave të Ukrainës, e nënshkruar disa orë përpara sulmit.
Sipas marrëveshjes së së premtes, Rusia ra dakord të mos synonte portet ndërsa dërgesat e grurit ishin në tranzit. Moska nuk ka komentuar mbi sulmin dhe Kievi ka thënë se përgatitjet janë ende duke u zhvilluar për të rifilluar eksportet e grurit, pavarësisht shkeljes së dukshme.
Por të shtunën, presidenti Zelensky tha se kjo tregon që Moskës nuk mund t’i besohet që t’i përmbahet marrëveshjes. Ai u zotua të bëjë gjithçka që është e mundur për të blerë sisteme të mbrojtjes ajrore të aftë për të rrëzuar raketa në të ardhmen.
Edhe SHBA përmes sekretarit amerikan të Shtetit Antony Blinken dënoi sulmin rus në portin e Odessa dhe theksoi se kjo vë dyshim besueshmërinë e Moskës.
Ukraina është një eksportues kryesor i drithit, por për shkak të luftës, rreth 20 milionë tonë drithë janë bllokuar në portet e saj, në pamundësi për t’u larguar për shkak të forcave ruse. Kjo ka çuar në mungesa ushqimore dhe rritje të çmimeve në të gjithë Afrikën, e cila zakonisht varet nga Ukraina dhe Rusia për grurin.
Ndërkaq Kievi akuzon se rusët kanë rrëmbyer të paktën 415 persona në rajonin jugor të Zaporizhzhia që nga 24 shkurti, dhe të paktën 170 janë ende në robëri. Kjo u pretendua nga guvernatori i rajonit Oleksandr Starukh, siç raportohet nga “Kiev Indipendent”.
