Radhë të gjata kanë shoqëruar dy ditët e fundit udhëtimet drejt Greqisë nga pikat doganore të Kakavijës dhe Kapshticës. Kjo, pas vendimit të shtetit grek për të aplikuar një sërë masash. Detyrim në kryerjen e testit, limitim të numrit të qytetarëve që do të hyjnë në Greqi dhe për të vendosur sistemin e karantinës për ata që hyjnë në territorin grek pas datës 17 gusht.
Në një reagim lidhur me këtë situatë, Ministria e Jashtme ka bërë të ditur se është në bisedime me palën greke për të zgjatur orarin e pikave kufitare, që sipas vendimit të autoriteteve greke janë në punë vetëm në oraret 07:00- 23:00.
“Pas vendimit të autoriteteve greke për të kërkuar vetëizolim 7 ditor dhe certifikatë të testit negativ për të gjithë shtetasit që kalojnë nga Shqipëria në Greqi, duke nisur nga data 17 gusht, gjatë dy ditëve të fundit ka pasur një fluks të shtuar qytetarësh në pikat e kalimit kufitar.
Ministria për Evropën dhe Punët e Jashtme është vënë në kontakt të menjëhershëm me palën greke dhe fillimisht u bë i mundur shtimi i testimeve të kryera në pikat kufitare prej 200 testimesh në orë, ndërsa në këto momente është arritur të realizohen 330 testime në orë.
Testimi vazhdon pa ndërprerje, për të gjithë qytetarët që kërkojnë të kalojnë nga Shqipëria në Greqi. Ndërkohë, nga autoritetet greke na është premtuar shtimi i mëtejshëm i kapaciteteve testuese në orët në vijim”, thuhet në njoftimin e Ministrisë së Jashtme.
Në njoftimin e saj Ministria bën të ditur se janë në kontakt të vazhdueshëm me palën greke.
“Po ashtu, jemi në bisedime për të zgjatur orarin e punës në pikat kufitare, në mënyrë që qytetarët të mund të kalojnë edhe në orët e vona të natës. Nga ana tjetër, Ministria e Shëndetësisë dhe Ministria e Mbrojtjes kanë vendosur në dispozicion të qytetarëve të bllokuar në radhë disa ekipe mjekësore dhe autoambulanca, si dhe shërbime higjienosanitare. Ne vazhdojmë të jemi në kontakt të vazhdueshëm me palën greke dhe shpresojmë që situata të shkojë drejt një zgjidhje sa më të shpejtë”, njofton ky institucion.
Kujtojmë që pala greke i ka bërë transparente prej disa ditësh masat e reja që do të aplikoheshin në kufirin me Shqipërinë./Opinion.al
