Qendrat e karantinës janë thelbësore për t’i dhënë fund pandemisë së koronavirusit, sipas ekspertëve të shëndetit në Singapor dhe Londër, të cilët krahasuan metodat e karantinës së detyruar në banesa të posaçme dhe karantinës në shtëpi.
Studiuesit krijuan një model simulimi për të parashikuar transmetimin e virusit, duke studiuar sjelljet në shtëpi dhe në institucione, në një qytet me 4 milion njerëz, në Singapor.
Rezultatet sugjeruan që karantina me bazë në shtëpi zvogëlonte kontaktin e një personi të infektuar me njerëz të tjerë me 50 % në shtëpi dhe 75 % në komunitet, ndërsa izolimi i detyrueshëm në institucione qeveritare, zvogëloi kontaktin me 75 % në familje dhe 90 % në komunitet.
Gjetjet u botuan të mërkurën e kaluar në revistën mjekësore The Lancet.
“Këto rezultate tregojnë nevojën për një izolim të detyrueshëm në institucione, për të zvogëluar transmetimin,”- thanë ekspertë të shëndetit publik nga Universiteti Kombëtar i Singaporit dhe Shkolla e Higjienës në Londër.
Artikulli thotë që strehat e izolimit në Wuhan ishin më efektive në zvogëlimin e rrezikut të transmetimit brenda familjeve.
Ndërkohë, në Europë dhe SHBA, izolimi në shtëpi ka qënë politika e zbatuar gjërësisht, për shkak të kapacitetit të kujdesit shëndetësor. Sipas Qendrave për Kontrollin dhe Parandalimin e Sëmundjeve (CDC) në SH.B.A., personat e infektuar duhet të përpiqen të izolohen në shtëpi derisa të trajtohen në spital.
Artikulli pohonte se: “Megjithëse qytetet në Europë dhe SHBA mund të mos jenë në gjendje të krijojnë qendra izoluese të ngjashme me ato të Wuhan, për shkak të mungesës së pranueshmërisë sociale ose perceptimeve negative të publikut, strategji të tjera duhet të merren parasysh për të zvogëluar transmetimin, të tilla si hotele apo konvikte.”/Opinion.al
