Kryeministri Edi Rama dërgoi dje në QSUT, në repartin e Djegie-Plastikës ish-drejtoreshën e tij, Olgerta Manastirlliu për të dhënë lajmin e mirë se një fëmijë vetëm 2 vjeç i djegur në 70 % të trupit do të dërgohet jashtë shtetit për mjekim më të specializuar. Olgertën e ndoqi nga pas një kamera e kryeministrisë e cila më pas shpërndau edhe njoftimin për mediat duke i dhënë kështu pikë kryeministrit që kreu këtë akt human.
Gjatë deklaratës së saj, Olgerta Manastirlliu nuk përmendi në asnjë rresht punën e mjekëve të këtij spitali për të mbajtur në jetë vogëlushen nga Peqini e shtruar prej disa ditësh në Reanimacionin e Djegie-Plastikës. Ajo tha vetëm se “me porosi të Kryeministrit unë jam këtu për të siguruar dërgimin për kurim të specializuar në një klinikë, e cila merret me trajtime të tilla në Turqi”.
Këtë moment duket se nuk e ka përtypur lehtë mjekia që është kujdesur për shëndetin e vogëlushes, Albana Myftiu. Përmes një statusi në facebook ajo bën të ditur se stafi i këtij spitali ka bërë gjithçka dhe ia ka dalë të mbajë në jetën vogëlushen si dhe ta dërgojë në gjendje të stabilizuar në Turqi.
Ajo tregohet e kujdesshme për të mos atakuar drejtpërdrejt Kryeministrin, apo ish-drejtoreshën Manastirlliu por nëpër rreshta lexohet qartë mesazhi se “mjekët dhe infermierët janë heronjtë e heshtur që qendrojnë pranë pacientit dhe larg kamerave”.
Statusi i plotë i mjekes Albana Myftiu në facebook
Do te doja ta nxirrja te sheruar Altean e vogel nga reanimacioni i Djegies, por familjaret e vogelushes i nderruan rrjedhen e trajtimit duke insistuar ta mjekonin jashte Shqiperise, gje e cila u arrit me nderhyrjen e vecante te kryeministrit Rama.
Ajo kaloi me shume veshtiresi, por me sukses gjendjen kritike te shokut te djegies, fale punes se pergjegjshme, te palodhur e profesionale te infermierve te Reanimacionit te Djegies qe kane shpetuar me dhjetra jete femijesh e te rriturish te djegur rende. Ajo do vazhdoje trajtimin e komplikuar nga koleget tane te huaj, te cileve ua dorezuam vogelushen me parametra vitale te stabilizuar.
Ekipi i Djegies tregoi edhe njehere se profesionalizmi dhe elementi bashkepunues mjek-infermier jane fitimtare ndaj semundjes se djegies, qe merr jo pak jete edhe neper bote.
Une ju falenderoj: Mira, Diana, Lahe, Veti, Moza, Besa, Nertila, Anna, Floresha, Tereza, Vini, Zyli, Zerina. Ju jeni heronjte e heshtur, prane te semurit e larg kamerave te medias, te cilat nuk afrohen kur behet fjale per sukses ne shpetimin e jeteve te semura!
Misioni yne u krye :)
Deklarata e Kryeministrisë
Vogëlushja 2-vjeçare Altea Jubi, e cila prej disa ditësh po lufton me jetën, pasi është djegur në 70% të trupit, do të dërgohet për trajtim të specializuar në Turqi. Kryeministri Edi Rama, pasi u njoh me rastin e vogëlushes që ka prekur opinionin publik, ka kërkuar informacion të plotë për gjendjen shëndetësore të saj, pas të cilit është kujdesur për t’i siguruar një kurim më të specializuar të menjëhershëm. Deputetja e qarkut të Tiranës, Ogerta Manastarliu, e cila vizitoi sot 2-vjeçaren, në Qendrën Spitalore “Nënë Tereza”, konfirmoi se tashmë është siguruar transportimi i saj në një klinikë të njohur për trajtime të tilla në Turqi. Sipas Manastarliut, gjendja e vogëlushes paraqitet e rëndë, ndaj u mundësua edhe ndërhyrja sa më e shpejtë për t’i shpëtuar jetën.
“për vajzën 2-vjeçare. Në fakt, ashtu siç referojnë edhe mjekët, gjendja është kritike. Nuk mund të jepen garanci. Por ajo çfarë ne sigurojmë është që do t’i jepet shërbimi më cilësor i mundshëm, pa humbur aspak kohë,” – u shpreh deputetja Manastarliu.
/R.D-Opinion.al
