Lulzim Basha vendosin që 8 Janari dita e protestës së thirrur nga ish-kryeministri Berisha të ishte një ditë normale pune. Ai kishte thirrur Kolegjin e Kryetarëve dhe po vijohej puna sipas axhendës së planifikuar pavarësisht se protestuesit po mblidheshin para godinës.
I pyetur në një intervistë për ABC, se përse thirri në seli funksionarë të partisë duke i rrezikuar, kryedemokrati tha se asgjë nuk mund t’i pengojë që të bëjnë detyrën e tyre si opozitarë.
Basha tha gjithashtu se ai vetë dhe funksionarët e thirrur në mbledhje nuk ishin në vendin dhe orën e gabuar, por sipas tij në vendin e gabuar me mjetet e gabuara ishte Sali Berisha dhe mbështetësit e tij.
Juxhin Mustafaraj: “Zoti Basha, flasim për atë çfarë ndodhi më 8 janar. Masat ishin marrë në Partinë Demokratike. Ndoshta media nuk ka pasur akses për të hyrë brenda selisë blu, por të paktën nga ajo që ndodhi në 8 janar u pa që masat ishin marrë në selinë e Partisë Demokratike. Ju atë ditë thirrët disa funksionarë të Partisë Demokratike, thirrët Kolegjin e Kryetarëve duke ditur që nga ana tjetër dhe ju thatë që keni pasur informacione që do të ushtrohej dhunë, a do të ishte mirë që të mos rrezikohej jeta e funksionarëve të Partisë Demokratike dhe le të themi ju për shkak të mbrojtjes që keni edhe nga strukturat e shtetit dhe disa funksionarë të Partisë Demokratike të ishit të vetmit që duhej të ishit atë ditë në seli?”
Lulzim Basha: “Ju nuk keni veshur një xhaketë të bardhë dhe këmishë të zezë. Ju keni veshur një këmishë të bardhë dhe një xhaketë të zezë dhe e vërteta është ndryshe nga ajo që parashtruat ju. Ne ishim në një sesion mbledhjesh normale, në detyrën tonë si opozitarë, si drejtues të Partisë Demokratike dhe asgjë nuk ka penguar, nuk na pengon dhe nuk do të na pengojë të bëjmë detyrën tonë. Nuk ishim ne në vendin e gabuar në orën e gabuar me mjetet e gabuara, por Sali Berisha dhe organizata e tij kriminale.”
