Presidenti Ilir Meta ka dhënë një deklaratë për mediat pas takimit me kreun e Grupit Parlamentar të PS, Taulant Balla, me të cilin ka diskutuar për datën e zgjedhjeve të pjesshme vendore. Presidenti ka propozuar dy data 27 Shkurt ose 6 Mars për mbajtjen e zgjedhjeve lokale në bashkitë që janë pa kryetar.
Ndërkohë para gazetarëve Meta u shpreh se nuk ka bërë asnjë ftesë zyrtare për konsultime me partitë politike për zgjedhjet e pjesshme vendore, ndërsa theksoi se takimi me Ballën ka qenë konsultë informale.
“Nuk ka patur ftesë zyrtare për forcat politike. Për të zgjidhur këtë çështje, iniciativat kanë qenë zyrtare me KQZ, kryeministrinë dhe Gjykatën Kushtetuese për Bashkinë e Lushnjes. Në rast se unë do kisha bërë ftesa për partitë do iu isha drejtuar të gjitha forcave politike që në këtë rast do ishte për kryetarin, por ishte një kërkesë informale, për një konsultë me kryetarin e Grupit Parlamentar të shumicës, zotin Balla duke qenë se kemi disa dilema lidhur me procedurat. Qëllimi im është që të jap kohë maksimale që nuk ka të bëjë me forcat politike por edhe KQZ për administrimin e procesit. Nuk do donim të kishim debate me shumicën për dispozitat ligjore apo procedurat.
Më tej Meta tha me ironi se kishte ftuar Ballën pasi nuk i dihej nëse shumica kishte bojkotuar zgjedhjet.
“Mos kush e di shumica bojkoton zgjedhjet. Por mora garanci nga Balla se janë të gatshëm në çdo kohë”. tha Meta./Opinion.al
