Pazar politik i cilëson Lulzim Basha marrëveshjen mes PS dhe PD që drejtohet nga Sali Berisha për ngritjen e dy komisioneve hetimore dhe ngritjen e një platforme nga komisioni i Ligjeve ku palët do të diskutojnë për të gjetur konsensusin për ato ligje që kërkojnë shumicë të cilësuar votash në Parlament.
Nga Berati, Basha iu përgjigj edhe kryeministrit Edi Rama që akuzat e mëparshme të tij i cilësoi broçkulla.
Basha thotë se nëpërmjet këtyre pazareve, Rama dhe Berisha mbajnë peng Shqipërinë. Deri para se të nisnin negociatat mes Gazment Bardhit dhe Bledi Çuçit, ishte Basha i cili po bashkëpunonte me PS në komisionin e reformës zgjedhore, ndërsa ishte gati të bashkonte edhe votat për amnisitin penale.
Për këtë fundit nuk i dha votat në parlament pasi kërkoi heqjen e amendamentit të dorëzuar nga grupi Parlamentar i PD, ose siç u njoh ndryshe amendamenti “Nallabti”.
‘Nuk është marrëveshje për anëtarësimin në BE, por është pazar i pastër mes rrangalleve të vjetra të tranzicionit, që duan të mbajnë peng Shqipërinë, duke ruajtur monopolin e sistemit, sepse vetëm ashtu mund të mbajnë njëri-tjetrin, sipas lojës 35-vjeçare, që i yti mishin të ha, por kockën ta ruan.
Sot nuk ka shqiptar që beson përrallat e Edi Ramës, i cili një ditë i quan idiotë ata që akuzojnë se po bën pazar, ndërsa të nesërmen vetë zyrtarizon pazarin me Sali Berishën, të cilin, kur s’i duhet e quan “Non grata”, ndërsa kur i hyn në punë, e quan partner për jetën parlamentare.
Pazari për të mbrojtur plaçkën e ndryshimeve kushtetuese të vitit 2008, është i qartë, por përveç kësaj, së bashku ata duan edhe të zhbëjnë ligjin e dekriminalizimit, duke i hapur rrugë personave me precedentë penal dhe zyrtarëve të dënuar për korrupsion, që të kenë mundësi të kandidojnë në zgjedhjet e radhës. Edi Rama ka treguar se pa bashkëpunim me krimin e organizuar nuk mund të fitojë dot.
Ashtu sikurse të dy janë të interesuar për t’i bërë presion drejtësisë së re, e cila ka premtuar se nuk do të kursejë askënd, pavarësisht hierarkisë apo pozicionit të lartë shtetëror.
Partia Demokratike është e vendosur për një koalicion të gjerë me qytetarët dhe me të gjithë faktorët politikë që duan një Shqipëri të njerëzve dhe për njerëzit kundër kastës së vjetër 35-vjeçare të dinosaurëve të korrupsionit.’- shkruan Basha.
