Blerta Dervishi, punonjësja e policisë që protestoi dje kundër shembjes së shtëpisë së saj pranë shkollës “Petro Nini” në Tiranë, është pezulluar nga detyra. Asaj i është komunikuar sot ky vendim.
Blerta Dervishi është punonjëse e policisë pranë Repartit “Shqiponja” në Policinë e Tiranës. Ajo banon bashkë me 14 persona të tjerë në ndërtesën te “Petro Nini”, ndërsa ditën e djeshme Përmbarimi shkoi për t’i nxjerrë jashtë, pasi tokës ku është ndërtuar banesa i ka dalë pronari.
Në një prononcim për “News 24” ajo ka thënë se masa e pezullimit i është komunikuar fillimisht në telefon e pastaj me shkrim , për shkak se ka penguar punonjësit e përmbarimit të kryenin detyrën.
“Më morën në telefon dje dhe më thanë që do të pezullohesh dhe do të marr vërejtje se kam penguar përmbarimin të kryejë detyrën. Ndërsa sot m’u komunikua me shkresë se pezullohem 1 deri në 3 ditë dhe pezullimi shoqërohet edhe me vërejtje. Unë mbrota shtëpinë time. Veprimet e mia ishin jashtë orarit të punës, nuk kishte lidhje me detyrën”, ka thënë Blerta Dervishi.
Dje, Ministri i Brendshëm Sandër Lleshaj e quajti jo korrekte sjelljen e Policisë së Shtetit, ndërsa kryeministri Rama tha se qeveria nuk ka tagrin për të dalë mbi një vendim gjykatë./Opinion.al
