Fëmijë që qanin, njerëz të shtrirë në rrugë dhe një grua shtatzëne që përplasjen me efektivët e policisë. Ishin këto pamjet që mbizotëruan për më shumë se 4 orë në media dhe rrjetet sociale, pasi një vendim gjykate i formës së prerë për shembjen e një ndërtese pranë shkollës “Petro Nini” solli përplasje mes banorëve dhe përmbaruesve.
Godina në të cilën jetojnë 5 familje, është ndërtuar mbi një truall që me vendim gjykate i ka kaluar pronarit. Por banorët pretendojnë se pronari ka falsifikuar dokumentet dhe e ka fituar në mënyrë të jashtëligjshme pronën.
Avokati i banorëve, Klodian Reçi ka treguar për Opinion.al gjithë procesin ligjor si dhe manipulimet, sipas tij, që janë bërë për këtë pronë. Ai thotë se këta banorë e kanë privatizuar banesën në 1993 pasi aty kanë jetuar prej 70 vitesh ku fillimisht kanë qenë qiramarrës. Në 1995 Komisioni i Kthimit të pronave vendos për kthim fizik në një kohë kur aty ishte ndërtuar nga shteti, e sipas avokatit ishte në kundërshtim me ligjin.
“Ka një vendim gjykate të formës së presë. Pas këtij vendimi ka disa zhvillime të tjera juridike. Pasi kanë fituar gjyqin këta kanë bërë një deklaratë noteriale dhe shprehen: Meqenëse ne kemi qenë në konflikte të vazhdueshme civile, gjykata ka vendosur x-y që ju të lironi dhe të dorëzoni objektin dhe të paguani një detyrim prej 270 milionë lekësh, si detyrim meqenëse i kanë përdorur tokën e këtyre të tjerëve”, thotë avokati Klodian Reçi.
Sipas tij banorët bënë një deklaratë noteriale me pronarët e rinj, ku thuhej shprehimisht: “ne si kreditorë heqim dorë nga ekzekutimi i vendimit të gjykatës dhe ju si familjarë hiqni dorë nga rekursi në Gjykatën e Lartë”.
Pasi banorët dhe pronarët e rinj nënshkruajnë deklaratën noteriale bëjnë dhe një kontratë sipërmarrjeje me një shoqëri që zotërohej nga ana e pronarëve, ku thuhej: Ne marrim përsipër ndërtimin e apartamenteve me X metra katrorë. Pra thelbi i kësaj marrëveshjeje ishte që pronarët e rinj të vazhdonin të bënin pallat dhe banorët të merrnin pjesën që iu takonte.
“Ndërsa ishin në pritje të zbatimit të kësaj marrëveshjeje kreditori (pronari) ndryshoi mendje. Jo thotë, nuk do t’ju jap më apartamente dhe e kërkon ta rivendos prapë në ekzekutim vendimin e gjykatës, vendim për të cilin kishin bërë deklaratë noteriale. Familjarët më pasi drejtohen gjykatës me një padi, ku i thonë se ne nuk jemi dakord me vendimin e përmbaruesit gjyqësor sepse ne kemi lidhur marrëveshje tashmë. Kur bëhet deklaratë noteriale mes palëve bien efektet juridike. Gjykata e shkallës së parë i jep të drejtë dhe thotë se ky vendim i gjykatës është i pavlefshëm, sepse e keni zgjidhur konfliktin. Çështja shkon në gjykatën e Apelit ku ndodh çudia. Gjykata e apelit i jep të drejtë palës kreditore dhe i thotë rrëzimin e padisë dhe ky konflikt vazhdon. Sipas këtij vendimi kreditori nuk e ka falur detyrimet pavarësisht se ka bërë një deklaratë noteriale. Këtu kemi dy vendime të kundërta për të njëjetën çështje. Gjykata e faktit mendon ndryshe dhe iu jep të drejtë familjarëve, Gjykata e Apelit i jep të drejtë kreditorëve”, thotë avokati Klodian Reçi.
Më pas familjarët i drejtohet me një kërkesë Gjykatës së Lartë dhe bëhet rekurs, për të gjykuar cila është vlera ligjore e kësaj deklarate. Por sipas avokatit kjo gjykatë më paturpësinë më të madhe nuk pranoi kërkesën e pezullimit, mbi vendimin e Gjykatës së Apelit.
Më pas ai tregon dhe se si u bë një ankand fiktiv për këtë pronë. “Ligji i jep të drejtën që kreditori, ai që ka fituar gjyqin të jetë i pranishëm gjatë ankandit. Sepse meqenëse se gjykata e lartë nuk vendosi pezullimin, familjarët duhet të paguajnë dhe 270 milionë. Në kushtet kur nuk kishin pasuri të tjera për të rikuperuar shumë 270 milionë lekë si detyrim për përdorimin e tokës, atëherë shkon dhe vendoset sekuestro mbi shtëpinë. Kështu në ankand këto dy objekte kishin vlerën 150 mijë euro dhe prapë sot familjarët janë në debitorë. Pra këta kanë humbur dhe shtëpinë, por janë dhe debitorë. Në ankand përveç kreditorit, prezent ishte dhe një person tjetër dhe një shoqëri tregtare. Pra ishin dy veta që kërkonin të blinin këto dy shtëpi. Kjo shoqëri tregtare na figuron që është një shoqëri tregtare që e zotëron kreditori (pronari i ri). Por ligji nuk e lejon që kreditori të marrë pjesë në dy forma dhe si kreditor por ka fut dhe një subjekt tregtar që e zotërojnë kreditorët dhe është bërë me qëllim që kjo shoqëri ti prishi dhe më vonë të marrë një leje ndërtimi”./ Opinion.al
