Teksa shkencëtarët po punojnë pa reshtur për një vaksinë kundër koronavirusit, një grup ekspertësh evropianë njoftuan se kanë gati një program për telefonët inteligjentë, e cila gjurmon njerëzit që kanë pasur kontakte me personat e prekur nga koronavirusi.
Iniciativa evropiane e quajtur, Pan-European Privacy Preserving Proximity Tracing, ose projekti PEPP-PT, ka bashkuar 130 kërkues nga 8 vende evropiane. Qëllimi i tyre është lancimi brenda datës 7 prill, i një platforme teknologjike të licencuar, që do të ndihmojë autoritetet shëndetësore të parandalojnë përhapjen e pandemisë.
Më konkretisht, kjo iniciativë nënkupton mbledhjen e të dhënave përmes smartphone-ve për të treguar se me kë ka patur kontakte një person që ka rezultuar i prekur me koronavirus, për t’i njoftuar më pas ata.
Aftësia për të gjurmuar personat në rrezik për t’u infektuar mund të ndihmojë në shmangien e bllokimit total të një shoqërie, e cila ka pasur një impakt të madh në ekonomitë e shumë vendeve./Opinion.al
