Aldo Baxhaku – Pavarësisht referencës kryeministrore që ka ky shkrim ai nuk është për qeverinë e as për partitë. Është një marrëzi që ka përfshirë ndërgjegjen kolektive të shoqërisë sonë prej vitesh tashmë. Ajo është bërë histerike dhe nuk ka më standarde, vlera, ndëshkime, vlerësime, përgjegjësi dhe as kuptim.
Çfarë nuk kemi parë e dëgjuar ditët e para të këtij viti por ajo që i vuri vulën ishte lirimi i një të dënuari me burgim të përjetshëm me motivacionin e sjelljes së mirë dhe për më tepër që kishte siguruar edhe një kontratë pune sipas të cilës do të paguhej 350 mijë lekë në muaj.
Do të isha shumë dakord nëse argumenti mbrojtës i këtij skandali do të ishte në terma ekonomikë. Domethënë kështu vendosi tregu. Personalisht jam shumë dakord dhe mendoj se tregu i lirë është rregullatori më i mirë i një shoqërie. Po ky është një realitet i një bote tjetër dhe jo në Shqipëri ku tregu është çfarëdolloj gjëje përveç se i lirë. Këtu ku klientelizmi me tenderat dekurajon dita ditës çdo biznes dhe ku vjedhja me PPP i ka bërë hajdutët të mëshirohen kur i kapin. Pra ky nuk është një vendim racional tregu por një goditje e radhës për ata që vërtet punojnë në këtë vend. Ata që nuk cilësohen se sillen mirë. Ata që çdo ditë shkojnë në punë pavarësisht se paguhen pak. Ata që presin e ngjeshen në urban edhe pse çmimi iu është rritur. Ata që paguajnë taksat rregullisht dhe kur ato rriten fshehurazi. Ata që nuk kënaqen kurrë me arritjet e tyre dhe përpiqen çdo ditë për të rritur eksperiencën dhe njohuritë pavarësisht se në fund mbeten pa punë sepse i thonë që vendi është zënë. Të gjithë këta nuk sillen mirë ata madje mund të përfundojnë në burg.
Ndër bëmat e tjera të histerisë kolektive janë dhe arrestimet dhe burgosjet me trumbetime të zyrtarëve dhe profesionistëve, për të qenë konkret po përmend dy arkitektët në aksionin e fundit në Tiranë. Këta arrestohen me bujë të madhe dhe për veprimet e tyre nuk mban përgjegjësi njeri. Pafytyrësia e përgjigjes “veprime individuale” është një nga ato toksina që e kanë helmuar këtë vend duke e mpirë totalisht ndaj skandaleve që e rrethojnë. Po pse ore këta zyrtarët e paaftë dhe arkitektët kriminelë kush i mori në punë? Këta vendosën që të zgjohen një mëngjes dhe të bëjnë sipas qejfit, të sigurt se nuk i ndëshkon ligji? Për nga natyra e punës së tyre ata duhet të jenë profesionistë të pozicionit ku punojnë. Në qofshin emëruar aty si shumë të mirë kur në fakt janë zero atëherë emëruesi ka qenë qorr e shurdh. Por dhe kjo nuk qëndron sepse një i paaftë e tregon shpejt fytyrën e tij. Këtu po burgosen profesionistë dhe të vetmit profesionistë që nuk burgosen janë vrasësit.
Ata janë të një niveli shumë të lartë. Vritet prokurori, gjykatësi, avokati, polici, punëtori, biznesmeni dhe e vetmja gjë që kapet është makina e djegur. Vrasja nuk dënohet madje ajo pas disa kohësh edhe mund të rehabilitohet.
Ky nuk është problem qeverie e as partie. Ky është tregues se varfëria na ka bërë shumicën prej nesh të angazhohemi gjatë gjithë kohës për të mbajtur frymën gjallë e për të qenë sa më të mirë në punë dhe nuk na lë kohë të vështrojmë vërdallë për të kuptuar se atë që kemi të përbashkët e ka marrë lumi. Dinjiteti humb kur dija dhe vlera fshihen para injorancës dhe hajdutllëkut.
Buxheti për arsimin sa vjen e ulet, niveli i arsimit të mesën është në pikatë siç tregoi edhe vlerësimi i PISA-s, kërkimi shkencor në arsimin e lartë është në nivelin më të ulët në rajon. Shkurt, cilësia e hapësirës për dije dhe për reflektim është rrënuar, është lënë si ato sektorët e teknologjisë që janë jashtë kohe dhe së shpejti do ti vijë koha që do të zhduken dhe në godinat e tyre do të instalohen sipërmarrje të reja. Në Shqipërinë tonë këto të fundit janë mbjellje kanabisi, trafik droge, fotografim dhe regji për liderët dhe një skizofreni tifozllëku partiak.
Sjellja e paturpë nuk të bën superhero e as hero të rëndomtë. Ata janë simbol i shpresës se drejtësia do të vijë dhe se të gjithë do të ndihemi të vlerësuar prej peshës që ajo do të na japë. Këto janë ëndrra, ëndrra që mbijnë në një vend ku ka vakum vlerash e të bërë pis nga arroganca. /Opinion.al
