U prezantuan sot dy ofertat me projektet inxhinierike për ndërtimin e Tunelit të Llogarasë. Gara midis 7 anëtarëve është reduktuar vetëm në dy konsorciume të cilat kanë prezantuar projektet e tyre për Metodologjinë e Punës dhe Zgjidhjet Teknike që ofrojnë.
Aktualisht në garë është konsorciumi i përbërë nga 5 kompani, austriakët e “iC Consulenten”, “ELEA iC” dhe “IBE” të Sllovenisë dhe dy kompanitë vendase “SEED Consulting” dhe “InfraKonsult”.
Nga ana tjetër është bashkimi i kompanisë italiane “SWS Engineering” dhe “LLAZO” me “NET-GROUP”.
Tuneli i Llogarasë pritet të jetë një vepër komplekse inxhinierike por qeveria ka kërkuara që procesi i tenderimit të mbarojë në kohë rekord në mënyrë që puna të mund të nisë para zgjedhjeve të prillit.
Megjithatë, ministrja e Infrastrukturës, Belida Balluku nuk la pa përmendur sigurinë rrugore që duhet garantuar.
“Siguria rrugore u nënvizua nga të dy studiot projektuese, duhet të merret parasysh edhe eficenca e kostos. Juria duhet të marrë parasysh edhe eficencën e kostos pasi duhet të garantojmë sigurinë por përmes një investimi sa më eficent. Nuk kërkojmë thjeshtë një zgjidhje infrastrukturore por edhe një zgjidhje arkitekturore duke qenë se Llogaraja është një nga pikat tonë me shumë rëndësi për turizmin. Duhet të nisim sa më parë procedurën e tenderimit, do të bëhet me para të buxhetit të shtetit dhe me mbështetje financiare dhe duhet të hapet tenderi brenda këtij projekti” u shpreh Balluku.
Ndërtimi i tunelit do të financohet nga buxheti i shtetit, që do të thotë se qeveria do t’i drejtohet një tjetër borxhi.
Ai do të jetë i gjatë 6 kilometra dhe pritet të shkurtojë rrugën nga 55 minuta në 10 minuta.
Në bazë të çmimeve referencë të Bashkimit Europian, çmimi i Tunelit të Llogarasë mund të variojë nga 150-190 milionë euro./ Opinion.al
