Presidenti i Republikës së Shqipërisë, Bajram Begaj ndodhet në Zvicër së bashku me liderët botërorë, ku po merr pjesë në Samitin për Ukrainën.
Gjatë fjalës së tij para liderëve botërorë të mbledhur në qytetin Burgenstok të Zvicrës, Begaj theksoi nevojën imediate për gjetjen e një rruge drejt paqes, për të ndalur tragjedinë njerëzore të shkaktuar nga agresioni rus, si dhe të frenojë konfliktin qe kërcënon Evropën e më gjerë.
Ndërsa bëri thirrje për solidaritet ndërkombëtar me Ukrainën si viktimë e agresionit rus, Presidenti Begaj deklaroi se “Shqipëria e konsideron formulën e paqes së Presidentit Zelenski si mënyrën për të rikthyer një paqe të drejtë dhe të qëndrueshme për Ukrainën”.
“Çdo proces paqeje duhet të drejtohet nga Ukraina”, – deklaroi Presidenti i Shqipërisë teksa konfirmoi vijimësinë e mbështetjes për Ukrainën derisa të arrihet paqja, në përputhje me Kartën e OKB-së, duke respektuar sovranitetin dhe integritetin territorial të Ukrainës, si dhe duke nënvizuar faktin që Rusia duhet të mbajë përgjegjësinë për veprimet e saj.
“Rruga drejt paqes nuk duhet të jetë kurrë një rrugë dorëzimi. Ajo duhet të jetë një rrugë e ndërtuar me guximin për të mbajtur lartë vlerat tona”, – theksoi Presidenti Begaj, i cili ftoi liderët botërorë të ndërmarin masat që i pergjigjen rëndësisë së këtij momenti.
