Është zbuluar në një lokal në zonën e ish-Bllokut aktiviteti kriminal i shitje së kokainës. Sipas policisë për shkak të informacioneve të marra se në një lokal në zonën e ish-Bllokut në Tiranë kryhej aktivitet kriminal i shitjes së lëndëve narkotike është bërë i mundur kontrolli i befasishëm nga blutë.
Gjatë kontrollit të bërë me leje nga Gjykata e Tiranës janë gjetur disa doza kokaine. Si pasojë 4 persona kanë rënë në prangat e policisë dhe 3 të tjerë janë duke u proceduar në gjendje të lirë pas aksionit të koduar “Blloku”.
Në pranga ka rënë pronari i lokalit 38-vjeçari me iniciale O.P, admistratori i lokalit 22-vjeçari A.A për kryerjen e veprave penale ”Përshtatja e lokalit për përdorim droge” dhe “Prodhimi dhe shitja e narkotikeve” kryer në bashkëpunim, një kamerier për kryerjen e veprës penale “Prodhimi dhe shitja e narkotikeve” dhe gjithashtu një klient për kryerjen e veprës penale “Prodhimi, mbajtja, blerja apo shitja pa leje e armëve të ftohta”.
3 persona të tjerë janë duke u proceduar penalisht në gjendje të lirë për shitje të lëndëve narkotike dhe mbajtje pa leje të municioneve.
Sipas njoftimit të policisë pronari i lokalit po kryente shpërndarje kokainë tek disa klient. Këtë aktivitet kriminal, pronari e realizonte përmes banakierit dhe kamarierit, që mbanin kontakte të herë pas hershme me klientët e lokalit.
Policia arriti t’u gjente dy klientëve në lokal nga një dozë kokaine. Më pas në pjesën e fundit të banakut, në një ambient të veçuar, u gjetën mbetje lëndë pluhur e bardhë e dyshuar si kokainë. Gjatë kontrollit kamarieri i lokalit ka hedhur në tokë një kuti shkrepse me katër doza kokainë.
Gjithashtu është gjetur një patentë që i përkiste personit me inciale E. H, klient në këtë lokal si dhe thikë me palosje e hedhur në dysheme. Në njoftimin e policisë thuhet gjithashtu se janë sekuenstruar edhe 9 fishekë luftarak.
Njoftimi i policisë:
Finalizohet operacioni policor i koduar “Blloku”, për goditjen e veprimtarisë kriminale në fushën e drogave të forta
Operacioni nga Seksioni i Narkotikëve në D.V.P Tiranë në bashkëpunim me Prokurorinë e Tiranës.
Sekuestrohen në një lokal të përshtatur për përdorim lëndësh narkotike, doza me lëndë narkotike Kokainë, fishekë luftarakë e një armë e ftohtë thikë.
Në pranga 4 shtetas, ndërmjet tyre pronari dhe administratori i lokalit, si dhe tre të tjerë janë proceduar penalisht në gjendje të lirë.
Seksioni i Narkotikëve në D.V.P Tiranë pas një pune hetimore, në kuader të procedimit penal të vitit 2019, ndjekur me metoda speciale të hetimit dhe në zbatim të Vendimit të Gjykatës së Rrethit Gjyqësorë Tiranë finalizoi me sukses operacionin policor “BLLOKU”, si rezultat i të cilit u arrestuan në flagrancë shtetasit:
- P., 38 vjeç, per kryerjen e veprave penale ”Përshtatja e lokalit për përdorim droge” dhe “Prodhimi dhe shitja e narkotikeve” kryer në bashkëpunim. (pronar i lokal ndodhur në zonën e ish-Bllokut).
- A., 22 vjeç, për kryerjen e veprave penale “Përshtatja e lokalit për përdorim droge” dhe “Prodhimi dhe shitja e narkotikeve” kryer në bashkëpunim (Administrator i një lokali në zonën e ish-Bllokut.
- Ll,, 30 vjeç, për kryerjen e veprës penale “Prodhimi dhe shitja e narkotikeve”. (kamarier i lokalit).
- H., 31 vjeç, për kryerjen e veprës penale “Prodhimi, mbajtja, blerja apo shitja pa leje e armëve të ftohta” (klient i lokalit).
Janë proceduar në gjendje të lirë dy shtetas për kryerjen e veprës penale ”Prodhimi dhe shitja e narkotikeve” dhe një shtetas tjetër për kryerjen e veprës penale ”Mbajtja pa leje e armëve shpërthyese dhe i municionit”.
Specialistët e Seksionit për Hetimin e Narkotikëve kishin marrë informacion se pronari i një lokali në zonën e ish-bllokut, shtetasi O. P. ushtronte aktivitetin e shitjes së lëndës narkotike Kokainë në doza të vogla klientëve të tij dhe për ushtrimin e këtij aktiviteti kriminal përdorte kamarierët dhe banakierët, të cilët mbanin kontakt të herëpashershëm me klientët e këtij lokali, për të mos rënë në sy.
Pas dokumentimit të këtij aktiviteti kriminal është siguruar nga Gjykata e Rrethit Gjyqësore Tiranë lejimi i kontrollit të brendshëm dhe të jashtëm të lokalit, dhe si rezultat i kontrollit të befasishëm u bë kapja në flagrancë e shtetasve të lartëpërmëndur duke tregtuar lëndë narkotike Kokainë.
Gjatë kontrollit të ushtuar, dy klientëve u është gjetur nga një dozë me lëndë narkotike të dyshuar Kokainë. Po gjatë kontrollit në brendësi të lokalit, në pjesën e fundit të banakut, në një ambient të veçuar, me hyrje nëpërmjet banakut janë konstatuar mbetje lëndë pluhur e bardhë e dyshuar Kokainë, e sende të tjera që shërbejnë për mbajtjen dhe përdorimin e lëndës narkotike.
Në momentin e kontrollit nga Policia, kamarieri i lokalit shtetasi A.LL ka hedhur në tokë një kuti shkrepse me katër doza kokainë
Në pjesën para banakut të lokalit është gjetur një qese brenda së ciles, ndodhet nje leje drejtimi me emrin e shtetasit E. H., dhe një thikë me palosje e cila ishte hedhur në dysheme nga shtetasi E.H. Gjithashtu janë gjetur dhe sekuestruar edhe 9 fishekë luftarak.
Materialet proceduriale do t’i kalojnë Prokurorisë pranë Gjykatës së Shkallës së Parë Tiranë, për veprime të mëtejshme hetimore për veprat penale “Prodhim dhe shitje narkotikësh kryer ne bashkepunim”, “Përshtatje e lokalit për përdorim droge”, “Prodhimi, mbajtja, blerja apo shitja e armëve të ftohta” dhe “Mbajtja pa leje dhe prodhimi i armëve dhe municionit luftarak”./Opinion.al/
