Policia e Shtetit ka qenë e përfshirë në operacionin ku u kapën 1.2 ton kokainë në Greqi dhe u arrestuan 6 shqiptarë.
Lajmi është konfirmuar nga vet autoritetet shqiptare, të cilat deklarojnë se ishin pjesë e operacionit që udhëhiqej nga DEA amerikane. Po ashtu, në këtë operacion janë përfshirë dhe autoritetet greke dhe spanjolle.
Kreu i kësaj organizate dyshohet të jetë Aleksandër Pema, i cili është arrestuar së bashku me 5 shqiptarët e tjerë; Arbër Përdeda, Ergon Tusi, Erlin Zotaj, Lek Doda dhe Maksim Preçi.
“Në këtë operacion Policia e Shtetit shqiptar mori pjesë në mënyrë të drejtpërdrejtë me hetime pro-aktive që u zhvilluan duke dhënë një ndihmesë dhe kontribut në identifikimin e personave të organizatës, roleve te tyre individuale dhe në mënyrën e funksionimit të organizatës kriminale, gjë që na mundësoi të identifikohen dhe konstatohej plotësisht përbërja dhe veprimtaria e saj. Operacioni është në vijim dhe Policia e Shtetit është duke kryer detyrat e saj në bashkëpunim të ngushtë me të gjithë aktorët që janë përfshirë në këtë operacion për identifikimin e persona të tjerë të përfshirë në këtë veprimtari kriminale”, thuhet në njoftimin e Policisë së Shtetit.
Nga hetimet është zbuluar se sasia e kokainës që u kap në Agrinjo, kishte hyrë përmes portit privat të Katakolos dhe më pas ishte fshehur në një kompleks dhomash plazhi në fshatin Astakos./ Opinion.al
