Policia e shtetit ka dalë në një tjetër reagim zyrtar lidhur me aksionin e orëve të para të mëgjesit për prishjen e godinës së Teatrit Kombëtar. Në reagimin e tyre ata pretendojnë se opinioni publik është dezinformuar përmes mediave nga një sërë individësh lidhur me operacionin e zbrazjes së godinës së Teatrit Kombëtar.
“Policia e Shtetit garanton opinionin publik, me përgjegjësi të plotë ligjore dhe morale se çdo akuzë e përfaqësuesve të partive politike apo individëve të tjerë, për gjoja ushtrim dhune apo armatim në trupat e përfshira në operacion. Këto janë të pavërteta fund e krye dhe e vërteta është se forcat operacionale të Policisë kanë bërë detyrën në kushte tejet të vështira, si rezultat i mungesēs së plotë të mirëkuptimit nga ana e të grumbulluarve në territorin e Teatrit Kombëtar”, shkruhet në njoftimin e policisë.
Më tej ata theksojnë se dy punonjës policie po marrim ndihmë mjekësore dhe fatmirësisht janë jashtë rrezikut për jetën. Megjithatë në pamjet e bëra publike në media shihet se ka qytetarët të gjakosur nga situata e krijuar tek teatri. Në momentin e ndërhyrjes tek teatri forcat e policisë shihen duke spërkatur spraj tek aktivistët dhe në një video tjetër një polic shihet duke shkelmuar një protestues të shtrirë në tokë.
Policia sqaron gjithashtu ndalimin e gazetarit Alfred Lela.
“Asnjë prej të shoqëruarve, nuk është shoqëruar si gazetar në detyrë. Gazetari A. Lela është shoqëruar pas thyerjes së paligjshme të kordonit të Policisë dhe i është marrë deklarimi si gjithē të tjerēve”, deklaron policia. /Opinion.al
