TIRANË- Në përgjigje të deklaratës së kreut të PD, Lulzim Basha për djegien e laboratorit shkencor të kriminalistikës në polici ka reaguar Drejtoria e Përgjithshme e Policisë së Shtetit. Në këtë deklaratë thuhet se zjarri që ra pas mesnate ka qenë aksidental dhe për këtë janë njoftuar prokurorët, përfshirë edhe kryeprokurori Adriatik Llalla. Por policia nuk sqaron se pse kjo ngjarje nuk u njoftua në mëngjes nga policia e cila njofton mediat edhe kur sekuestron për 10 grame kanabis.
Më poshtë është njoftimi i plotë i policisë
Në vijim të informacionit paraprak në lidhje me zjarrin e rënë, ju informojmë se: Rreth orës 02.15 minuta në Drejtorinë e Policisë Shkencore (godina e dytë Laboratorit Qendror të Kriminalistikës) e cila ndodhet brenda territorit të Gardës së Republikës, u konstatua një vatër zjarr. Menjëherë u njoftua Salla operative e Policisë së Tiranës dhe shërbimi zjarrfikës, të cilët ndërhynë për izolimin dhe shuarjen e vatrës së zjarrit. Ndërkohë u njoftua zyra e Prokurorit të Përgjithshëm dhe në vendngjarje mbërriti Prokurori i gatshëm i Prokurorisë së Tiranës. U krijua grupi hetimor nën drejtimit e Prokurorit, me përbërje të ekspertëve të fushës, si: ekspertë të OSHEE-së, të shërbimit zjarrfikës, oficerë të Policisë gjyqësore të Komisariatit nr.2, si edhe specialistë të Hetimit të Krimit të SHÇBA-së. Grupi hetimor po vijon veprimet për gjetjen dhe zbulimin e shkaqeve të zjarrit. Paraprakisht, grupi hetimor mendon se shkak i zjarrit është një shkëndijë elektrike në një kabëll në katin e dytë të godinës, në korridor. Ndërkohë vijojnë verifikimet, në përfundim të të cilave do bëhen me dije shkaqet e zjarrit.
