Nga Gerta Zaimaj
Gay Talese, një gazetar i njohur i New York Times, publikoi vitin e kaluar, historinë e Gerald Foos, ish-pronar i një moteli në Denver të Kolorados, i cili rrëfente se kishte spiunuar dhe përgjuar, për 29 vite me radhë, klientët e tij teksa kryenin marrëdhënie seksuale.
Në një letër dërguar gazetarit, Foos i rrëfente se në 1966, në Denver, kishte blerë një motel me 21 dhoma të quajtur “Manor House”. Kishte ndërhyrë në to duke krijuar kafaze të rremë ventilimi dhe në të gjitha mund të vëzhgonte pa u vënë re çiftet që ishin brenda tyre. Këtë gjë ai e kishte bërë vazhdimisht pa u pikasur asnjëherë, deri kur e shiti përfundimisht motelin.
Historia ishte tepër interesante, pasi pronari i motelit (Foos), tregonte se kishte mbajtur të dhëna të sakta për klientët që e kishin frekuentuar. Foos e konsideronte gjithçka një studim, ai ishte i martuar dhe baba i dy fëmijëve. Në komunikimet e Foos me gazetarin Talase, ai thuhet se i kërkoi gazetës New York Times që të mos e paraqiste atë si një të sëmurë, që përgjonte çifte, apo maniak, por si një studiues.
Nga autoritetet shtetërore të Kolorados nuk u ngritën asnjëherë akuza ndaj tij, megjithëse vitin e kaluar publikimi i kësaj historie hapi mjaft debate. Ndër pyetjet që dominoi opinionin publik ishte: “A ka Gerald Foos të tjerë që vëzhgojnë klientët nëpër hotele?” Askush nuk mund ta garantojë këtë, por duhet thënë se kjo temë i kapërcen kufijtë e Shteteve të Bashkuara, pasi çështja e privatësisë haset kudo. Fjala vjen edhe në Shqipëri. Por nëse Gerald Foos ishte thjesht një vëzhgues – mbase edhe maniak – të tjerë mund të mos jenë vetëm të tillë. Mund të jenë edhe shantazhues.
Në periudhën 29-vjeçare kur Foos kreu vëzhgimet e tij, teknologjia ishte e prapambetur. Por sot është shumë më ndryshe. Sot pronarët si Foos nuk e kanë të nevojshme të bëjnë “kafaze të rremë ventilimi” në dhomat e moteleve apo hoteleve të tyre. Sot kryen punë lehtë nëpërmjet teknologjisë së avancuar. Mjafton një kamera e vogël, vënë në vendin e duhur dhe kjo bëhet arma e tyre. Mbase rrëfenja e Gerald Foos e kaloi lehtë pasi për 29 vite në motelin e tij nuk erdhi kurrë asnjë i famshëm. Çdo të ndodhte nëse fjala bie, në të do kishin vajtur njerëz me pushtet, njerëz të njohur dhe politikan?
Së fundmi në Shqipëri bëri bujë deklarata e ish-Ministrit të Drejtësisë Ylli Manjani, se ministra të Qeverisë frekuentonin hotelin e të shumë-kërkuarit Kelment Balili. Mbase Balili përveçse i denjë për nofkën “Escobari i Ballkanit”, mund të jetë i denjë edhe për nofkën “ Foosi i Shqipërisë”. Mbase përgjimet e tij ndaj këtyre njerëzve me pushtet, dhe jo lidhjet miqësore me ta, është ndër armët që e mbajnë atë të lirë dhe kaq të pa-prekshëm.
Në hotelin “Santa Quaranta”, kanë pushuar sa e sa modele, këngëtare shqiptare, Manjani deklaroi që edhe krerë politik, apo oficerë policie. Kujtoj që disa nga liderët politik kanë qenë edhe në inaugurimin e këtij kompleksi. Por policia gjatë kontrollit të imtësishëm në hotelin e tij nuk gjeti asnjë të dhënë nga kamerat e sigurisë. Kështu ngrihen disa pyetje, ku janë këto filmime? Çfarë kanë filmuar ato kamera? Të cilat përveçse mund të ndihmojnë në dhënin e detajeve për akuzat apo kapjen e Balilit; ato mund të nxjerrin zbuluar edhe disa nga politikanët. Jo vetëm se me kë kanë frekuentuar hotelin, por a kanë darkuar apo jo me Balilin. Rasti Foos ishte për ‘studim’, por ky mund të jetë për ‘kërcenim’!
Mund të ketë politikan që kanë qenë me femra siç tha Manjani, por mund të ketë edhe nga ata që janë takuar, kanë biseduar, darkuar, bashkëpunuar me atë që njihet sot si “Eskobari i Ballkanit”.
Ka dy rrugë, ose ato filmime janë zhdukur, ose pse jo, po përdoren nga Balili, si një formë shantazhi i fortë ndaj politikanëve. /opinion.al
