Nga Dritan LACI
Ajo më pak e mendueshmja ndodhi atëherë kur nuk duhet të ndodhte. Në një ndeshje që duhet të përfaqësonte kulturën më të mirë sportive të dy popujve që kanë ndarë shumë nga historia e njëri-tjetrit. Por që në fakt më shumë se futbolli I luajtur në fushë, duket se vëmendje mori dhe do të diskutohet gjatë për atë ndërprerje të lojës në minutën e 57-të si pasojë e hedhjes së flakadanëve në fushë nga një sektor i tifozerisë shqiptare të pranishme në ‘Renzo Barbera’.
Edhe pse situata në fillim ishte e paqartë si vetë tymi që mbuloi stadiumin tashmë me përfundimin e ndeshjes gjithçka është kthjelluar. Madje është rrëzuar edhe ajo “pritshmëri’ që këta dashakeqës të mos ishin tifozë shqiptarë por të infiltruar që kërkonin që me këtë akt të dëmtonin imazhin e Kombëtares së Shqipërisë me aq mund të ndërtuar në Kampionatin Evropian që lamë pas në Francë 2016.
Dhe në fakt ata tifozë nuk ishin as serbë të infiltruar sikundër do kishim dëshiruar të kishin qenë, as agjentura të vendeve të huaja që duan destabilizimin e Shqipërisë, por shqiptarë nga ata me plis në kokë. Thuhet se janë grupimi “Plisat” e Prishtinës. Disa thonë se janë grupimi ‘Illyrian Elite’. Po ç’rëndësi ka emri i grupimit kur ata që u bënë shkak qe me veprimet e tyre janë tifozë shqiptarë. Arsyeja e këtij veprimi?!! Sipas tyre një hatërmbetje e thellë dhe e vjetër e mbarsur prej kohësh me Federatën e Futbollit Shqiptar dhe veçanërisht me kreun e saj Armand Duka. Një hatermbetje që nis e jep shenjat e para në ndeshjen me Serbinë në “Elbasan Arena” ku ata lihen jashtë stadiumit i cili për hir të së vërtetës ka më shumë kollaro zyrtarësh sesa tifozë nga ata që e ndjekin këmbë-këmbës.
Vazhdon me krijimin nga ana e Federatës Shqiptare të Futbollit të grupimit ‘Tifozat e Kombëtares’ e cilësuar nga grupimi ‘Tifozët Kuqezi’ si një sfidë ndaj tyre dhe për të vazhduar më tej me atë që ndodhi në ndeshjen ndaj Izraelit ku tifozët e Kombëtares folën për keqtrajtim nga policia si edhe për lënie me qëllim jashtë stadiumit pasi pretendonin që FSHF kishte abuzuar me shitjen e biletave.
Moment që do të kriste përfundimisht marrëdhëniet midis tifozeve Kuqezi dhe grupimeve të tjera nga Kosova dhe Maqedonia me Federatën Shqiptare të Futbollit, ku grupimet e tifozëve vendosën bojkotin paafat të ndeshjeve te Kombëtares që do të luhen në Shqipëri. Dhe siç ndodh zakonisht me fodullëkun që mbizotëron në Shqipëri ku palet nuk ulet të bisedojnë për të sheshuar probleme ndodhi ajo që ndodhi mbrëmë.
Ku e vetja e papërgatitur duke se ishte Federata Shqiptare e Futbollit e cila duhet të bëhet gati për një gjobë të majme nga FIFA në mos për një ndëshkim spektakolar që do ti linte gjatë tifozët shqiptarë jashtë stadiumeve të Evropës. Një situatë që nuk është e para në vitet e fundit por ku fajtori nuk ka vetëm një emër.
A duhet të fajësojmë vetëm ‘Plisat’ apo kushdo qoftë për këtë situatë? A është kjo mënyra per të dëmtuar një Federatë që në mendimin e tyre i ka keqtrajtuar? A ka nevojë Kombëtarja për kaq shumë grupime tifozësh shpesh të pamenaxhueshme? Çfarë duhet të ndryshojë Federata në marrëdhënien me këto grupime? Mbrëmë pati një shpërthim në rrjetet sociale ku disa i etiketonin si Plisa disa si Pisa. Në fakt si duhet ti shikojmë si Plisa apo si Pisa këta tifozë? Nëse deri dje ai plis na bëri krenar a mund ta bëjmë pis po vetë me këto sjellje aspak të hijshme vetëm për inat të Dukës apo kushdo qoftë më vonë në krye të Federatës Tani që vetëm zyrtarisht nuk është shpallur falimenti në këto eleminatore është koha të ndalemi dhe para se të vejmë gishtin të fajtorët të ulemi dhe të bisedojmë. Kombëtarja do të ishte e paplotë pa plisat në kokë por askush nuk ka të drejtë ta bëj pis festën e tifozëve shqiptarë duke u sjellë telashe të tilla.
Problemet duhet të nisin të rregullohen që nga sjellja e tifozëve në Kampionatin shqiptar të futbollit. Krijimi i kushteve sa më të mira për ta dhe jo përzënia kolektive nga stadiumet me vendime të dyshimta sa herë që Federata ndihet e fyer nga koret e tifozëve që i drejtohen institucionit dhe kreut të saj. Ishte skandaloze të lexoja ditën e djeshme në të përditshmen më të madhe sportive në vend prononcimin e Presidentit të Mamurrasit i cili shprehej se ‘nëse arbitri do të gabonte në ndeshjen Itali-Shqipëri do të zbriste në fushë dhe do ta rrihte sepse ai është shqiptar dhe nuk I duron padrejtësitë’.
Një deklaratë e tillë është e patolerueshme dhe në një vend me standarde të tjera do të ishte e dënueshme dhe jo të kalohej në heshtje si një deklaratë e një njeriu të papërgjegjshën. Deklaratë që për fat mirë nuk ka rënë në dorë të mediave të huaja pasi do ishim bërë turpi i botës. Ndaj është koha për dialog dhe zgjidhje ndryshe Palermo e mbrëmshme në rastin më të keq mund të jetë edhe një ‘Vaterlo’ e nesërme për futbollin shqiptar Dhe nesër do jetë shumë vonë…/Opinion.al
