Deputeti socialist, Alket Hyseni, përdori fjalë fyese ndaj ish-kryeministrit Sali Berisha; duke e quajtur “plak autik”. Por për përdorimin e këtij termi, kanë reaguar ashpër shumë personalitete të jetës publike në vend.
Deputetja e PD-së, Orjola Pampuri, e konsideroi një rast të shëmtuar që buron nga padija e atij njeriu.
Deklarata e Hysenit nuk nxiti vetëm reagimin e kolegës Pampuri, por më herët me tone të ashpëra reagoi edhe drejtuesja e fondacionit “Down Syndrome Albania”, Emanuela Pepkola Zaimi, duke kërkuar dorëheqjen e Alket Hysenit.
Në një postim në “Facebook”, Zaimi është shprehur se ajo do të kërkojë çdo ditë që Hyseini të japë dorëheqjen dhe të mos jetë më përfaqësues i popullit shqiptar, e i paguar me taksat tona.
“Nga ky moment e deri sa të bëhet realitet unë do të bej të pamundurën që ky deputet të japë dorëheqjen e të mos jetë më përfaqesues i popullit shqiptar dhe i paguar me taksat tona. Të mos guxojë me politikan të përdorë gjendjet e fëmijeve tanë për fyerje”,– shprehej ndër të tjera Zaimi.
Aktivisti i Shoqërisë Civile dhe pedagogu Erion Kristo, ka kërkuar që deputeti socialist të kërkojë urgjentisht falje për fyerjen e tij, si dhe kryetari i grupit parlamentar të PS-së të marrë masa ndaj Hysenit, derisa ccështja të sqarohet plotësisht.
Ka qenë edhe psikologia Denada Toçe që ka reaguar pas deklaratës së deputetit të Partisë Socialiste, Alket Hyseni, në të cilën ky i fundit përdori shprehjen “autik” për fyerje dhe kauzë politike.
Në një postim në rrjetin social Facebook, Toçe ka shkruar se deputeti socialist duhet të kërkojë falje për përdorimin e fjalës “autik”, si një epitet fyes për një figurë politike të vendit.
Deri më tani, vetë Alket Hyseni nuk ka kërkaur as edhe një ndjesë publike, e jo më të japë dorëheqjen.
Mirëpo, çfarë mund të kishte ndodhur në një shtet tjetër europian nëse një politikan apo zyrtar i atij vendi do të kishte lëshuar një deklaratë të tillë?
Sjellim në vëmendje rastin e zv/kryeministrit bullgar, Valeri Simeonov, një nacionalist aleat i kryeministrit konservator, i cili dha dorëheqjen pas disa javësh protestash nga nënat e fëmijëve me aftësi të kufizuara të cilat u ndjenë të ofenduara nga deklaratat e tij, në një kontekst të tensioneve sociale.
”Jap dorëheqjen nga posti i zëvendëskryeministrit të qeverisë bullgare”, deklaroi për median, Simeonov. Zyra e shtypit e qeverisë bëri të ditur nga ana e saj se dorëheqja u pranua nga kryeministri, konservatori Bojko Borisov.
Nënat e fëmijëve me aftësi të kufizuara u mobilizuan fillimisht për të kërkuar në parlamentin bullgar ndihmë më të mirë sociale. Ato protestonin çdo mbrëmje në Sofje prej disa javësh për të kërkuar dorëheqjen e zëvendëskryeministrit, pasi ky i fundit e kishte cilësuar absurde kauzën e tyre se po përdornin fëmijët dhe mashtronin shoqërinë për përfitime materiale.
Rasti i Bullgarisë tregon edhe një herë tjetër se sa larg standardeve evropiane ndodhet Shqipëria, ku drejtuesit e qeverisë, deputetët apo kryebashkiakët ofendojnë pa turp qytetarët duke i etiketuar si shpellarë, vandalë, përtacë, etj./Opinion.al/
