Teksa numri i të prekurve nga koronavirusi vjen duke u rritur në vendin tonë, mjeku Pëllumb Pipero shprehet se java tjetër është vendimtare dhe nëse nuk zbatohen masat e qeverisë do të përfundojmë si Italia.
Referuar shtimit të rasteve të reja, Pipero thotë se kjo gjë nuk është normale dhe për këtë arsye qytetarët duhet të ndërgjegjësohen e të mbyllen në shtëpi.
“Pas cdo rasti të konfirmuar fshihen 10 apo 15 raste të tjera. Në këtë situatë pandemie dhe shtimit të rasteve të prekura iu kërkojmë qytetarëve të jenë mirëkuptues dhe të ndjekin udhëzimet e qeverisë. Ne mjekët shohim vetëm majën e ajsbergut, ndërkohë që ISHP ndjek rastet e kontaktit, ne mjekojmë rastet që na vijnë. Java që nis është decizive për të parë edhe numrat edhe për të parë efektshmërinë e masva të marra. E përsëris, nga ky virus askush nuk është i paprekshëm, pavarësisht se dikush ka apo nuk ka komplikacione. Numri i rasteve është dyfishur në një ditë, pra sa më shumë të mos zbatojmë masat aq më shumë shtohen të prekurit. Minimalisht të qëndrojnë në shtëpi është shumë pak për të fituar shumë jetë njerëzish. Nesër do të jetë shumë vonë. Nesër i afrohemi një hap më shumë skenarit italian, por nëse qytetarët nuk na dëgjojnë, nuk kam c’tju them më pastaj: Zoti na ruajtët…”,-tha Pipero./ Opinion.al
