Pezullohet procesi gjyqësor për një vit në ngarkim të vëllezërve Leonard dhe Erlis Duka, Oltian Loga, Aleksander Manxhaku dhe Dritan Agaj. Ata akuzohen për vrasjen e ish-policit Santiago Malko. Gjykata e Posaçme mori një vendim të tillë për shkak se ata janë në kërkim dhe nuk është bërë njoftimi i tyre për nisjen e gjykimit në ngarkim të tyre.
Ndërsa seanca për Ilir Selmani, Xhoni Nica dhe Elvis Gaçaj, është shtyrë pasi njëri nga avokatët kërkoi kohë që të njihej me dosjen voluminoze të Prokurorisë së Posaçme. Ngjarja ndodhi mbrëmjen e 27 Gushtit 2019 në rrugën Xhanfize Keko në kryeqytet kur Malko sapo kishte dalë nga spitali i pediatrisë, ku kishte djalin të shtruar pasi ishte i sëmurë.
Krimi sipas SPAK ka si motiv përplasjen për dominimin e aktivitetit të lojërave të fatit mes dy grupeve kriminale atij Duka dhe Ervis Martinajt. Në dosjen e SPAK thuhet se për të kryer vrasjen janë përdorur në ngjarje dy automjete, njëri u gjet i djegur ndërsa në tjetrin grupi i hetimi mblodhi prova të vlefshme si materiale gjenetike me anë të të cilave përftoi profile ADN.
Hetuesit këto prova i kanë krahasuar me ADN e prindërve të personave të dyshuar ku ka rezultuar në përputhje totale. Gjithashtu në dosje thuhet se Santiago Malko u vra pas tentativës së dështuar për të ekzekutuar biznesmenin Ervis Martini. Në dosjen e SPAK nënvizohet se aëntarët e klanit Duka të kryesuar nga dy vëllezërit Leonard dhe Erlis Duka kishin paguar një sasi shumë të madhe parash për të mësuar vendndodhjen e Martinit.
Ata kishin kërkuar informacion në Turqi, Spanjë dhe më pas në Kosovë por pa rezultat. Në dosje thuhet se Blendi Teta pak orë para se të realizohej vrasja e Santiago Malkos ka zhvilluar një takim në paraburgim me Dritan Dajtin. Teta është prezantuar si kushëri i Dajtit në momentin kur ka hyrë në paraburgim. Në dosje nuk janë të zbardhuar detaje në lidhje me këtë takim dhe arsyet se përse Blendi Teta e ka takuar Dritan Dajtin.
Për Blendi Tetën ka nisur procesi i gjykimit pasi ai u arrestua disa ditë pas ngjarjes së rëndë. Santiago Malko ka qenë I dyshuar për dy ngjarje kriminale të ndodhura më herët. Ai më datë 26 Gusht 2018 në një lokal në Kinostudio,dyshohet të jetë përplasur dhe ka plagosur 3 persona, Juxhin Hamajezi, Rovaldo Mumajesi e Ibrahim Durollari. Ish-polici ishte i dyshuar edhe për një atentat të mbetur në tentativë ndaj Erlis Dukës./ Klan News
