Mbledhja e sotme e Komisionit të Ligjeve është shoqëruar me debate nga ana e deputetëve të Partisë Demokratike.
Teksa mazhoranca ka vendosur që disa mbledhje të komisioneve t’i zhvillojë online, PD është kundër kësaj nisme dhe e ka cilësuar këtë si një mundësi më tepër për implikim dhe korrupsion.
Nga një video të siguruar nga Opinion.al duket se ka patur debate mes palëve.
Bardhi dëgjohet t’i thotë Kryetares së Komisionit, zonjës Bushka se nuk mund të qetësohet teksa i tregon asaj Kushtetutën.
“Jo nuk qetësohem fare, është Kushtetuta e para mësoje këtë, pastaj është rregullorja”- thotë Bardhi me tone të larta të zërit.
Më tej Bardhi e akuzon kryetares së Komisionit, se nuk i jep fjalën opozitës.
“Nuk na e cakton ti. Duam fjalën, jemi prezent. Ti je prezent në sallë, ne jemi prezent në sallë, na jep fjalën. Nuk na i cakton ti ku logohemi dhe ku punojmë ne. A ka mundësi të na e japësh fjalën? Nuk mund ti mohosh deputetëve të drejtën e fjalës.”– tha Bardhi.
Për sot janë parashikuar edhe tre mbledhje Komisionesh të tjera që PD ka paralajmëruar se edhe aty deputetët e saj do të jenë të pranishëm.
