Partia Demokratike ka reaguar lidhur me incidentin e ndodhur gjatë ditës së sotme në Shkodër ku policë e doganierë u përplasën me tregtarë të duhanit, duke e cilësuar këtë një nga shfaqjet më brutale të individëve të pushtetit qeveritar.
Nënkryetarja e PD në Shkodër, Greta Bardeli, deklaroi se sjellja e policëve sot, është sjellja tipike e të pangopurve, e falangave të dhunës së qeverisë që provokojnë qytetarët në hallin e tyre.
Më herët, Kryetarja e Bashkisë Shkodër, Voltana Ademi, reagoi për ngjarjen, duke thënë se ky ishte horror politik mbi qytetarët shkodranë.
Ja deklarata:
Të dashur qytetarë të Shkodrës, mbarë opinioni publik është njohur me një nga shfaqjet më brutale të individëve të veshur me pushtetin e qeverisë ndaj disa qytetarëve që merren me tregti aq sa për të mbajtur me bukë fëmijët e tyre, e për të mbijetuar në këtë kohë dramatike për ekonominë dhe qytetarët e Shkodrës. Sjellja e të pangopurve, e falangave të dhunës së qeverisë që provokojnë qytetarët në hallin e tyre, është e papranueshme dhe e dënueshme për ne të gjithë si qytetarë.
Partia Demokratike i bën thirrje qytetarëve të denoncojnë dhe të bëjnë publik çdo rast të tillë dhe të gjithë si shoqëri të dënojmë me forcë akte të tilla. Qetësia, respekti, dinjiteti qytetar janë të shenjta dhe inpektorët e qeverisë mos të guxojnë të ngrenë dorën dhe armët ndaj grave, burrave.
Mos të guxojnë të provokojnë qytetarët e Shkodrës.
Të mbështetemi në vlerat tona qytetare dhe të përbuzim së bashku dhunën.
