Zëdhënësi i Kremlinit, Dmitry Peskov, tha se plani i NATO-s për një përmirësim masiv të mbrojtjes ajrore dhe raketore ishte një shenjë agresioni dhe do t’u kushtonte para taksapaguesve evropianë.
Duke u ndalur tek çështja e armëpushimit, Peskov theksoi se Rusia ishte e gatshme të respektonte marrëveshjet me Ukrainën për një shkëmbim të ri të të burgosurve të luftës dhe riatdhesimin e ushtarëve të rënë, raporton La Repubblica.
Gjatë fundjavës, Rusia akuzoi Ukrainën për shtyrjen e pacaktuar të shkëmbimeve, të dakordësuara gjatë një raundi të dytë bisedimesh të drejtpërdrejta për paqe në Stamboll këtë muaj. Presidenti ukrainas Volodymyr Zelensky u zotua të dielën të vazhdojë me shkëmbimet e të burgosurve me Rusinë, por tha se Ukraina nuk kishte marrë ende listën e plotë të të burgosurve që do të lirohen.
Peskov tha gjithashtu se ofensiva e supozuar nga ushtarët rusë në rajonin e Dnipropetrovskit të Ukrainës, synon gjithashtu të krijojë një “zonë tampon”.
Kompania Renault, në partneritet me kompani të vogla dhe të mesme franceze të mbrojtjes, po shqyrton hapjen e një linje prodhimi dronësh në Ukrainë.
Fabrikat e ndryshme do të vendosen “disa dhjetëra deri në disa qindra kilometra larg vijës së frontit”.
Nga ana tjetër, Sekretari i Përgjithshëm i Aleancës Atlantike, Mark Rutte, u shpreh se NATO duhet të rrisë mbrojtjen ajrore me 400%. “NATO duhet të rrisë me 400% aftësitë e saj të mbrojtjes ajrore dhe raketore në përgjigje të kërcënimit rus”, u shpreh Rutte.
“Ne shohim në Ukrainë se si Rusia përhap terror nga lart, kështu që ne do të forcojmë mburojën që mbron qiellin tonë”, shtoi Rutte.
Kujtojmë se është shënuar sulmi më i madh në Ukrainë, pasi kjo e fundit raporton se Rusia ka lëshuar ndaj saj 479 dronë gjatë natës. /tvklan.al
