Mëngjesin e sotëm është përmbysur në Belgjikë minibusi me 16 pasgjerë, dhe si pasojë e këtij aksidenti ka ndërruar jetë shoferi britanik dhe janë plagosur të gjithë pasagjerët.
Shoferi 67-vjeçar dyshohet se ka goditur një BMW e më pas ka vazhduar udhëtimin e tij me shpejtësi përpara se të humbiste kontrollin e drejtimit, deri në momentin kur minibusi është përmbysur në unazë.
Sipas CNN bëhet e ditur se shoferi ka ndërruar jetë menjëherë, ndërsa është plagosur në gjendje të rëndë një 15-vjeçar, i cili ndodhet në rrezik për jetën në spitalin Sint Vincentius në Antwerp.
Policia thotë se 15 pasagjerët e tjerë të cilët u plagosën në aksident, kanë marrë lëndime të lehta dhe shumica tashmë kanë marrë mjekimet e nevojshme.
Zëdhënësi i policisë së Antwerp, Wouter Bruyns tha për mediat lokale:
“Shoferi i BMW-së ndoqi minibusin, por ndaloi kur pa një makinë policie. Kur patrulla mbërriti në kryqëzim, autobusi ishte përmbysur. Shumica e pasagjerëve u plagosën lehtë, por kanë marrë mjekimet e nevojshme.”
