Milani është në krizë brenda dhe jashtë fushës. Në javën e fundit të kampionatit ka ardhur një humbje zhgënjyese 2-0 në fushën e Sampdoria-s që nuk është pëlqyer aspak nga drejtuesit kuqezi dhe që ka vënë në rrezik trajnerin Vincenzo Montella, i cili duhet të marrë dy rezultate pozitive kundër Roma-s dhe Inter-it në dy ndeshjet e ardhshme për të shpëtuar vendin e punës.
Por duket se situata është përkeqësuar brenda ekipit kuqezi. Në fakt, sipas “Corriere delllo Sport”, pjesa më e madhe e lojtarëve të Milan nuk ka respekt për ish-mbrojtësin e Juventus.
Disa nga lojtarët e “gardës së vjetër” mësohet se nuk janë aspak të kënaqur me kritikat që Bonucci i bën atyre në stërvitje dhe në ndeshje.
Gjithashtu, një pjesë e lojtarëve nuk janë të kënaqur me trajtimin që i është bërë atij nga klubit, duke i dorëzuar edhe shiritin e kapitenit.
Me pak fjalë, lojtarët kuqezi nuk e njohin Bonucci-n si liderin e tyre.
Kjo mund të jetë edhe një nga arsyet e paraqitjeve të këqija të milanezëve dhe i takon trajnerit Montella ta ndreqë këtë situatë para se të jetë tepër vonë.
