Megjithëse një vendim i gjykatës administrative i dha të drejtë kompanisë Bankers Petroleum për të mospaguar akcizën për holluesin e naftës bruto, Drejtoria e Përgjithshme e Doganave shprehet se ky vendim i referohet vetëm dy akteve administrative, çfarë nuk e ndalon atë të aplikojë legjitlacionin në fuqi të akcizës.
Drejtoria e Doganave i tha BIRN nëpërmjet një përgjigje me shkrim se pas vendimit të Gjykatës Administrative të Tiranës, e cila i kishte dhënë të drejtë Bankers-it për mos të paguar akcizën për holluesin e përdorur në operacionet hidrokarbure, DPD kishte kërkuar udhëzime nga Ministria e Financave.
“Në përgjigje, Ministria e Financave shprehet se; vendimet e gjykatave administrative të cilat i referohen një çështje konkrete në një moment të caktuar, nuk mund në asnjë rast të cenojnë zbatueshmërinë e legjislacionit në fuqi, si dhe kërkon marrjen e të gjitha masave në zbatim të ligjit, për vjeljen e detyrimeve të akcizës për produktin “hollues”, që nga data 01 Prill 2014,” tha DPD.
“Në vijim të sa më sipër, Drejtoria e Përgjithshme e Doganave është duke përgatitur dokumentacionin përkatës për vazhdimin e kontrollit pranë operatorit ekonomik,” shtoi ajo.
Një investigimi i botuar nga BIRN, zbuloi se edhe pse në vitin 2013 qeveria e qendrës së majtë të kryesministrit Edi Rama, ndryshoi ligjin “Për Akcizat” me synimin për të taksuar me akcizë edhe holluesin e përdorur nga Bankers Petroluem, i cili në atë kohë importohej, qeveria deri tani nuk e ka pasur të mundur ta mbledhë këtë taksë për shkak të vendimeve gjyqësore.
Vetëm në vitin 2017 qeveria pati shpresuar të arkëtonte 1.3 miliardë lekë (rreth 9.7 milionë euro), vetëm nga holluesi i përdorur për naftën bruto.
Sipas DPD-së vendimi i masës së sigurisë së padisë i vitit 2014, e ndalonte Drejtorinë e Përgjithshme të Doganave që të procedonte me vjeljen e taksës se akcizës për holluesin që përdor Shoqëria “Bankers Petroleum Albania.”
Masa e sigurisë ka rënë me vendimin e Gjykatës Administrative të Apelit dhe sipas DPD-së, kjo i ka zgjidhur duar për të përpiluar akte të reja kontrolli ndaj Bankers, edhe pse vendimin i themelit i Gjykatës Adminsitrative shprehet kundër qeverisë.
“Administrata Doganore ka bërë të gjitha përpjekjet ligjore për zbatimin e ligjit të akcizës lidhur me pagesën e akcizës për holluesin,” tha DPD.
/BIRN/
