Zyrtarë të Pentagonit pritet që t’i paraqesin Presidentit amerikan Donald Trump disa opsione ushtarake sesi SHBA t’i përgjigjet sulmit ndaj industrisë së naftës së Arabainë Saudite.
Bëhet e ditur se Washingtoni ka fajësuar Iranin për sulmin. Të premten e 20 shtatorit ushtria do t’i tregojë Trump-it një listë të synimeve të mundshme të sulmeve ajrore brenda Iranit.
Zyrtarët e Pentagonit do të paralajmërojnë Trump se veprimet ushtarake kundër Iranit mund të përshkallëzojnë në një koflikt të armatosur,
Vendimi për hakmarrje ndaj Iranit, mund të varet nga provat që amerikanët dhe hetuesit sauditë janë në gjendje të ofrojnë, për të mbështetur pretendimet se sulmet u nisën nga Irani.
Disa zyrtarë të administratës, përfshirë sekretarin e Shtetit, Mike Pompeo, kanë pohuar se Teherani është përgjegjës për sulmin.
Pas takimit me aleatët në Arabinë Saudite dhe Emiratet e Bashkuara Arabe, Pompeo tha më 19 shtator se ekzistonte një “konsensus i jashtëzakonshëm në rajon” që Irani kreu sulmin pavarësisht mohimeve të tij.
Irani ka mohuar përfshirjen dhe paralajmëroi Shtetet e Bashkuara se çdo sulm do të çonte në një “luftë gjithëpërfshirëse” me Teheranin.
Megjithë pretendimet, sekretari Pompeo ka deklaruar se Shtetet e Bashkuara “do të donin një zgjidhje paqësore” ndaj krizës së shkaktuar nga sulmi.
Tensionet në rajon janë rritur, pas sulmit të 14 shtatorit, në një fushë të naftës saudite dhe fabrikës më të madhe në botë të naftës së papërpunuar.
Rebelët Huthi të Jemenit, të mbështetur nga Irani, kishin thënë më herët se ishin mbrapa sulmit përderisa Teherani mohon çdo përfshirje.
Por, Uashingtoni dhe Rijadi kanë fajësuar Teheranin për sulmin.
Të mërkurën, Arabia Saudite ka paraqitur disa pjesë të raketave dhe dronëve, që tha se tregojnë se sulmi “është sponsorizuar padyshim nga Irani”.
