Pasi kanë kaluar 17 ditë nga rrëmbimi i egjiptianit Adel Mohamed Salam, familjarët e kapitenit të anijes “Çelepia 2”, Dhimitër Malaj, nuk kanë asnjë informacion për fatin e tij. Këtë të fundit, Salam nuk e ka ekspozuar në asnjë fotografi, sikurse bëri për marinarin Luan Mema, si dhe nuk ka dhënë asnjë lloj informate gjatë kohës që ishte në kërkim.
Shpresa e vetme për të mësuar detaje nga rrëmbimi dhe mbi fatin e kapitenit është kthimi i marinarit Luan Mema, i cili u gjet në kushte të mira shëndetësore në hambarin e anijes “Çelepia 2”. Ai ndodhet ende në Egjipt, ku po mbahet nga autoritetet që po hetojnë mbi këtë ngjarje, me qëllim zbulimin e vendndodhjes së kapitenit.
“Kanë kaluar 17 ditë nga zhdukja e babait dhe nuk kemi asnjë informacion se çfarë mund të ketë ndodhur. Kemi dëgjuar fjalë të ndryshme, por përpiqemi të mos u besojmë. Kemi dëgjuar se e ka hedhur në det. Sikur e ka lëshuar katër ditë para se të arrestohej për t’u kthyer në shtëpi! Kanë kaluar shumë ditë dhe shpresat tona ditëditës veniten. Nuk dimë çfarë të mendojmë, mendja na shkon për më të keqen. Shpresa vdes e fundit, ndaj shpresojmë se do të ndodhë ndonjë mrekulli”, tha për gazetën i biri i kapitenit Malaj, Darmian Malaj.
Djali i kapitenit shprehet se nuk ka mundur të marrë asnjë informacion nga institucionet e përfshira në hetimin dhe zbardhjen e kësaj ngjarjeje. “Asnjë institucion nuk na jep shpjegime si familjarë në lidhje me hetimet dhe dyshimet që kanë. Jemi në një situatë shumë të vështirë, pasi nuk dimë se çfarë ka ndodhur. Nëse ka ndodhur diçka e keqe, të na thonë, ne do të pranojmë fatin tonë. Po të paktën të na thonë diçka. Rrëmbyesi ka 1 javë që është arrestuar, ai diçka ka thënë për çfarë ka ndodhur me babanë tim. Policia atje e ka marrë në pyetje marinarin egjiptian, ai ka folur 100 % se çfarë ka ngjarë”, thotë ai. Në emër të familjes, Darmian Malaj bën apel për autoritetet.
“Si familjarë u bëjmë thirrje autoriteteve të na japin një informacion, qoftë edhe paraprak, pasi jemi shumë të shqetësuar dhe në ankth për fatin e babait. Po presim me padurim të kthehet Luani në Shqipëri për ta pyetur, por si duket ai po mbahet qëllimisht nga autoritetet egjiptiane, të cilat po hetojnë mbi ngjarjen. Nuk besoj të jetë çështje lekësh moskthimi i tij në Shqipëri. Unë mendoj se po mbahet qëllimisht nga autoritetet”, pohon djali i kapitenit, Dhimitër Malaj./ Leonidha Musaj Panorama.al
