Data 18 gusht shënon nisjen e pelegrinazhit drejt malit të Tomorrit, por këtë vit ky ngjarje do të zhvillohet nën masa të rrepta sigurie për shkak të pandemisë Covid-19.
Për mbarëvajtjen e këtij pelegrinazhi, që fillon në 19 gusht dhe përfundon në 25 gusht, Drejtoria Vendore e Policisë së Beratit ka marrë masat për garantimin e rendit dhe sigurisë publike
Shefi i Sektorit për Rendin dhe Sigurinë Publike në Berat, Dashamir Bendo ka deklaruar se shërbimet e policisë do të jenë më të përqendruara përgjatë akseve rrugore: Urë e Kuçit-Berat, Poliçan-Pronovik-Novaj–Teqe, Poliçan –Çorovodë dhe Çorovodë-Gjerbës–Teqe e Kulmakut, ndërkohë që pika të tjera që do të vendosen edhe në territorin ku zhvillohet aktiviteti i pelegrinazhit. Bendo ka konfirmuar se do të ketë prezencë të shtuar të efektivëve të policisë në akset kryesore, jo vetëm për të përballuar fluksin e automjeteve por edhe për ti orientuar ata drejt rrugës së Kulmakut. Bendo u ka bërë thirrje drejtuesve të automjeteve të respektojnë rregullat e qarkullimit në rrugë, bizneseve të shërbimit në Malin e Tomorrit të respektojnë protokollet e sigurisë dhe qytetarëve të përdorin maska e të ruajnë distancën, pasi në të kundërt-sipas tij-do të ketë sanksione të rënda ligjore.
Mali i Tomorrit konsiederohet “i shenjtë” nga besimtarët bektashinj, pasi në të prehet shenjtori i familjes së Profetit Muhamed, Abaz Aliu. Mali vizitohet gjatë 7 ditëve të pelegrinazhit nga mijëra pelegrinë nga Shqipëria, diaspora dhe mbarë bota, të cilët udhëtojnë drejt Teqesë së Kulmakut për të kremtuar festën e Baba Tomorrit nën ritet fetare të bektashinjve./ Opinion.al
