Kryeministri i Spanjës, Pedro Sánchez, tha se e sheh Kinën si ndërmjetësin kryesor global që mund të ndihmojë në përfundimin e luftës në Iran dhe konflikte të tjera, si ai në Ukrainë, dhe i bëri thirrje fuqisë aziatike të bëjë më shumë në frontin diplomatik.
“E kam shumë të vështirë të gjej ndërmjetës të tjerë, përveç Kinës, që mund të zgjidhin këtë situatë të krijuar në Iran dhe në Ngushticën e Hormuzit,” tha ai të martën pas takimit me presidentin kinez Xi Jinping.
Sánchez ndodhet në Kinë për vizitën e tij të katërt në pak më shumë se tre vjet, ndërsa Spanja kërkon të forcojë lidhjet politike dhe tregtare me ekonominë e dytë më të madhe në botë.
Ai tha se Spanja dëshiron të shmangë pandëshkueshmërinë për ata që kryejnë krime dhe e përshkroi atë që ka ndodhur në Gaza si “gjenocid”.
“Sot po shkelet e drejta ndërkombëtare, kryesisht nga një vend: qeveria e Izraelit,” tha ai. “Ka gjithashtu një përgjigje krejtësisht të paligjshme nga regjimi iranian lidhur me një luftë që ne e kemi përshkruar që në fillim si gabim dhe e paligjshme.”
