Partia Demokratike ka akuzuar sot kryeministrin Edi Rama se ai po mbron kryebashkiakun e Vorës, Agim Kajmaku. Në një deklaratë për mediat ish-deputetja Albana Vokshi ka deklaruar se Kajmaku ka përfituar nga Rama 2.6 milionë euro në tendera.
“PD ka publikuar fakte të pakontestueshme se Kajmaku është arrestuar në Greqi në janar 2013, duke tentuar të bëjë biznes me para të falsifikuara. PD ka treguar vendimin e Prokurorisë dhe Gjykatës së Janinës, që konfirmojnë se Kajmaku është në kërkim në shtetin grek. Pavarësisht fakteve, ai akoma nuk ka dhënë dorëheqjen dhe Rama akoma nuk e ka shkarkuar, duke i siguruar mbrojtje” ka deklaruar Vokshi.
Më tej ajo ka publikuar dokumente që sipas saj tregojnë se kompania e fidanëve “Kajmaku sh.p.k”, ka përfituar para publike në tendera nga Bashkia e Tiranës, e Durrësit si dhe nga OSHEE.
“Agim Kajmaku i Vorës, i arrestuar dhe akoma në kërkim në Greqi është klient pothuajse ekskluziv i Bashkisë së Tiranës dhe i Bashkisë së Durrësit. Erion Veliaj i ka dhënë Jorgo Totos që bënte biznes me para të falsifikuara rreth 440 mijë euro, ndërsa Vangjush Dako i ka dhënë rreth 580 mijë euro.
Vetëm në 2 muaj, Maj – Qershor, para votimeve moniste të datës 30, Edi Rama e ka paguar kriminelin e tij të Vorës me rreth 230 mijë euro nga fondet e buxhetit të shtetit” deklaroi ish-deputetja e PD.
Në deklaratën e saj Vokshi përmend se kompania e Agim Kajmakut ka përfituar 400 mijë euro nga paratë publike për të gjelbëruar rrethrrotullimin e Shkozës dhe rrugën që të con në Surrel. Megjithatë shton Vokshi, investimi në këtë zonë nuk është as 14 mijë euro. Ajo ka denoncuar se firma e Kajmakut ka bërë gjelbërimin brenda shtëpisë së kryeministrit Rama.
“Krimineli i Ramës është paguar me rreth 400 mijë euro për të gjelbëruar rrethrrotullimin e Shkozës dhe rrugën e Surrelit, që të çon në sarajet e Edi Ramës. Kushdo që kalon në këtë rrugë, mund të shohë vetë më sy se aty nuk janë hedhur as 14 mijë euro gjelbërim, jo më 400 mijë. Sipas denoncimeve të medias, Jorgo Toto është shpërblyer me këtë tender për punën private që ka bërë në vilën e Surrelit të Edi Ramës për ta mbjellë me ullinj dhe pemë të tjera” është shprehur Vokshi.
Këto fakte sipas përfaqësueses së PD tregojnë pse Edi Rama ka heshtur për rastin e Agim Kajmakut dhe pse ky I fundit vazhdon të mbetet në detyrë. /Opinion.al
