Partia Demokratike ka reaguar në lidhje me buxhetin e miratuar tre ditë më parë në Kuvend, i cili sipas PD nuk ndihmon qytetarët në situatën e pandemisë por vijon të financojë incneratorët.
Shefi i kabinetit të PD, Dorian Teliti, përmes një deklarate për mediat, thekson se qeveria i çon taksat e qytetarëve për të financuar inceneratorët dhe kontratat konçesionare.
“Kur bëhet fjalë për ju, për t’ju ndihmuar në këto muaj të vështirë të pandemisë, Edi Rama thotë se nuk ka para. Nuk ka para Edi Rama për të kryer testimet e popullatës, ndërkohë që vendet e tjera të rajonit testojnë të paktën 3 herë më shumë se ne. Nuk ka para Edi Rama për pensionistet që t’ju japë 2 mijë lekë të reja në muaj për maska e alkool. Nuk ka para Edi Rama për të ndihmuar me një bonus mujor dhjetëra mijëra kryefamiljarë që kanë humbur vendin e punës e nuk kanë me çfarë të ushqejnë fëmijët e tyre. Nuk ka para Edi Rama për bonusin prej 1000 euro për 100 mijë bizneset e vogla duke i braktisur ata, e duke i çuar drejt falimentit me qindra dita-ditës. Jo qytetare jo, për ju Edi Rama para nuk ka, pasi paratë e taksave tuaja nuk i ka për ju, nuk jua kthen ashtu siç duhet dhe nevojitet, por paratë tuaja i ka dhe i çon për të financuar miqtë e qeverise dhe kontratat konçesionare. Për inceneratorët e korrupsionit para ka patur, ka dhe gjithmonë do të ketë. Mjafton që ata të kërkojnë, dhe buxheti i shtetit i gjen paratë menjëherë” thotë Teliti.
Gjithashtu, Teliti thekson se nuk kanë mjaftuar 24 milionë eurot që ka marrë ky projekt ka marrë nga dita e nënshkrimit të kontratës e deri me sot por në buxhetin e vitit 2021 Rama i jep 4.1 milionë euro shtesë.
“Tre dite me parë, në menyrë tinzare, në seancë plenare të kuvendit ilegjitim, ku po diskutohej dhe miratohej nen për nen buxhetit i vitit të ardhshëm, Edi Rama miratoi amendamentin e kërkuar nga Erjon Veliaj, për t’i dhënë këtij të fundit 4.1 milionë euro shtese vetëm për të financuar inceneratorin e Tiranës. Ndonëse fillim viti u rritën nga 15% në 64% tarifat e pastrimit që paguajnë bizneset dhe qytetaret e Tiranës, përsëri para te tjera shtese nga taksat tona shkojnë për këtë incenerator.
Nuk mjaftonin 8.2 milionë euro qe ky projekt ka marre vetëm gjatë këtyre muajve të pandemisë. Nuk mjaftonin 24 milionë eurot që ka marrë ky projekt korruptiv, nga dita e nënshkrimit të kontratës e deri me sot. Babëzia e qeverisë edhe në muajt e fundit të saj nuk paska të sosur. Kap Ça të Kapësh, çdo qindarkë për oligarkët dhe më oligarkët.
Kjo të dashur qytetarë është e vërteta e hidhur. Prandaj më 25 Prill, Edi Rama do të marrë përsipër faturën politike për këtë braktisje të qëllimshme të qytetareve, bizneseve dhe ekonomisë shqiptare. Pas 25 Prillit, qeveria e re, e dale nga vota e qytetareve, do të bëjë çdo gjë për t’i dhënë fund pandëshkueshmërisë dhe të kthejë paratë e shqiptareve në xhepat e tyre” thotë Teliti./Opinion.al
