Ka përfunduar takimi mes ambasadorit të BE-së në vendin tonë Luigi Soreca dhe krerëve të partive të vogla, të cilat janë aleatët të Partisë Demokratike.
Takimi i tyre u zhvillua në ambientet e zyrave të BE-së në kryeqytet, ndërsa në fokus të diskutimeve ishte situata politike në vend.
Në takimin që zgjati një orë, morën pjesë krerët e partive LZHK, PAA, PBDNJ, PDK, PR.
Ndërkohë, Ftamir Mediu, kreu i PR, është shprehur pas këtij takimi, do t’i kërkojnë presidentit Ilir Mata që të thërrasë në një tryezë opozitën dhe mazhorancën.
Sipas tij, vetëm në këtë mënyrë mund t’i jepet fund krizës politike.
“Ne do ti kërkojmë Presidentit të Republikës që të thërrasë një tryezë të pozitës dhe opozitës për të zgjidhur këtë situatë për të garantuar zgjedhje të lira dhe të ndershme.Çdo gjë tjetër do të ishte shkatërruese për vendin. Soreca dhe të gjithë janë në mbështetje të dialogut.
Të arrijmë të garantojmë zgjedhje të lira dhe të ndershme dhe përfaqësimin e të gjithë subjekteve politike. Çdo lojë tjetër do të ishte shkatërruese për vendin dhe në këtë moment ne si forca politike mendojmë se është përgjegjësia jonë që të negociojmë me të gjitha palët dhe institucionet që duhet ta mundësojnë këtë dialog. Kështu kemi vepruar me OSBE, i kërkuam ambasadorit Soreca dhe jemi vlerësues që ai pranoi të diskutojë me ne dhe të shikojmë një hapësirë për të mbështetur një dialog të vlefshëm për interesat e vendit.”,-tha Mediu.
Deklarata e Mediut u mbështet dhe nga kreu i PBDNJ-së, Vangjel Dule, i cili u shpreh se politika duhet të ruaj demokracinë në vend.
Po ashtu ai theksoi se partnerët ndërkombëtarë duhet të na ndihmojnë për të zgjidhur ngërçin politik.
“Grupimi i partive të qendrës së djathtë kanë nisur një aktivitet që është një vlerë e shtuar në aksionin e përbashkët opozitar siç u nënshkrua para dy ditësh me PD. Boshti kryesor është shërbimi i axhendës opozitare që ka për synim që përfundimisht në vendin tonë të shkulet rrënja e së keqes që ka sjellë cikle të njëpasnjëshme krizash politike dhe për rrjedhojë edhe ekonomikedhe shoqërore.
Jemi të vendosur që me të gjitha mjetet dhe mënyrat që na imponon demokracia të aktivizojmë çdo qelizë të shoqërisë por në të njëjtën kohë të sensibilizojmë të gjithë partnerët tanë ndërkombëtarë me qëllim që zgjidhja të vijë sa më shpejt dhe me sa më pak kosto. Përvojat e hidhura të së shkuarës. 2017 nuk është shumë larg, duhet të na bëjnë të gjithë më të mençur, më të matur dhe të urtë, sidmos mazhorancën dhe kryeministrin që nuk janë ndërgjergjësuar ende për krucialitetin e situatës politike në vend dhe sillen me një arrogancë, prepotencë dhe mentalitet cubi”,-tha Dule.
Takimi i aleatëve të PD me ambasadorin e BE, erdhi vetëm pak ditë të firmosjes së marrëveshjes me PD, ku shprehnin qëndrimin e tyre kundër zhvillimit të zgjedhjeve më 30 qershor./ Opinion.al E.Xh.
